«Straty vielizarnyja». Minsk patrabuje ad Rasii vialikaj kampiensacyi za «padatkovy manieŭr» z naftaj

Biełarusi budzie składana samoj kampiensavać padzieńnie prybytkaŭ ad realizacyi padatkovaha manieŭru ŭ naftavaj śfiery ŭ Rasii. Pra heta zajaviŭ 29 listapada namieśnik ministra finansaŭ Andrej Biełkaviec na forumie dla zamiežnych inviestaraŭ BelarusCrossway'18. Videazapis raźmieščany na jutub-kanale mierapryjemstva, paviedamlaje Tut.by.

Biełaruś i Rasija abmiarkoŭvajuć miechanizm kampiensacyi biełaruskamu boku padzieńnia dachodaŭ z-za pačatku realizacyi padatkovaha manieŭru. Jon miarkuje, što ŭ 2019—2024 hadach vyvaznaja pošlina na naftu ŭ Rasii, jakuju nie vypłačvaje Biełaruś pry imparcie vuhlevadarodnaj syraviny, źnizicca z 30 da 0%. Adnačasova z hetym budzie pavyšacca padatak na zdabyču karysnych vykapniaŭ, što moža pryvieści da pavieličeńnia uvachodnaha koštu nafty dla Biełarusi.

Za rašeńniem dadzienaha pytańnia pilna sočać banki, zamiežnyja inviestary i finansavyja instytuty. Na forumie BelarusCrossway'18 jany sprabavali vyśvietlić u kiraŭnikoŭ Minfina Biełarusi, jakija isnujuć scenary raźvićcia padziej. Raniej analityki rasijskaj kampanii Vygon Consulting pryjšli da vysnovy, što za šeść hadoŭ realizacyi padatkovaha manieŭru dadatkovyja vydatki Biełarusi, źviazanyja šmat u čym z pavyšeńniem koštu rasijskaj nafty, składuć u ekvivalencie kala 8 młrd dalaraŭ.

— Samy niehatyŭny scenar — baki nie damovilisia i razyšlisia pa svaich pakojach, my pačynajem nieści straty. Tady na praciahu šaści hadoŭ hłabalnyja straty dla Biełarusi składuć kala 10 młrd dalaraŭ, — adznačyŭ Biełkaviec.

— 3 młrd — vypadajučyja prybytki biudžetu [ad ekspartnych pošlin]. 6 młrd — paharšeńnie ekanomiki dvuch naftapierapracoŭčych zavodaŭ. Ale heta kali ničoha nie mianiać. Takoha nie budzie. Buduć uvodzicca peŭnyja kampiensacyjnyja miery. Zavody nie buduć pierapracoŭvać usiu naftu, jakuju možna. Istotna ŭpadzie impart. Niehatyŭny ŭpłyŭ na ekanomiku zavodaŭ budzie minimizavany. Straty dachodaŭ biudžetu buduć kampiensavacca ŭ asnoŭnym za košt skaračeńnia vydatkaŭ.

Namieśnik ministra kanstatavaŭ, što ŭ Minfina niama mahčymaści niejkaha vialikaha manieŭru pa pavieličeńni dachodaŭ biudžetu. Jon nahadaŭ, što z 1 studzienia ŭstupić u siłu novy Padatkovy kodeks, jaki ŭvodzić maratoryj na ŭkaranieńnie novych padatkaŭ abo pavieličeńnie ich stavak na praciahu troch hadoŭ.

— My taksama razumiejem, što rost stavak nie budzie pryvodzić da rostu dachodaŭ, bo častka biznesu sydzie ŭ Smalensk abo «šeryja» zony, — skazaŭ Andrej Biełkaviec. — Uvohule, situacyja ciažkaja. Krynicy, jakaja b zamiaściła vypadajučyja prybytki ad ekspartu nafty i naftapraduktaŭ, ciapier paprostu niama. Tamu biełaruski bok zajmaje žorstkuju pazicyju ŭ pieramovach z Rasijaj.

Pry hetym jon adznačyŭ, što Biełaruś «znachodzić razumieńnie z rasijskaha boku» i abmiarkoŭvaje «miechanizm i kaeficyjent kampiensacyi».

Razhladajucca dva varyjanty kampiensacyi:

Rasija prapanuje mižbiudžetny tranśfiert, a Biełaruś, pavodle słoŭ premjer-ministra Siarhieja Rumasa, addaje pieravahu «fiksacyi hetaj kampiensacyi ŭ canie atrymanaj nafty». Pieršy vice-premjer, ministr finansaŭ RF Anton Siłuanaŭ niadaŭna zajaviŭ, što Rasija i Biełaruś damovilisia ŭ vypadku kampiensacyi strat ad padatkovaha manieŭru zrabić heta šlacham mižbiudžetnaha tranśfiertu. Pasoł Biełarusi ŭ RF Uładzimir Siamaška kanstatavaŭ, što «pa naftahazavych pieramovach prasoŭvańnie pakul nie vielmi vialikaje». Baki płanavali znajści ŭzajemaprymalnaje rašeńnie na 15 śniežnia hetaha hoda.

Andrej Biełkaviec taksama skazaŭ, što praces idzie niachutka, tamu kampiensacyja ŭ biudžet 2019 hoda nie zakładvałasia. Raniej biełaruski Minfin padličyŭ, što straty kazny ad realizacyi padatkovaha manieŭru ŭ RF u 2019 hodzie składuć kala 300 młn dalaraŭ pry canie na naftu 70 dalaraŭ za baral. Straty paŭstanuć z-za čakanaha padaražeńnia nafty dla Biełarusi, źnižeńnia ekspartnych pošlin na naftapradukty i mahčymaha źnižeńnia stavak akcyzaŭ na aŭtamabilnaje paliva ŭ Biełarusi.

U cełym, ličyć Andrej Biełkaviec, dziejańni rasijskaha boku supiarečać sutnaści stvareńnia Jeŭrazijskaha ekanamičnaha sajuza, jaki mierkavaŭ ab stvareńni adzinaha rynku enierhanośbitaŭ.

«Kali adzin bok ličyć mahčymym adstojvać tolki svaje intaresy, a inšyja pavinny z hetym pahadzicca, takoha być nie pavinna. U advarotnym vypadku vierniemsia da pytańnia metazhodnaści znachodžańnia Biełarusi ŭ takim sajuzie», — skazaŭ namieśnik ministra.

• 0
• 0
• 0
• 0
• 0
• 0
• 0
• 0