Centr reabilitacyi rukakryłych «Kažanapolis» z 3 śniežnia prymaje kažanoŭ na zimoŭku. Jaho stvareńnie inicyjavali Minskaje haradskoje adździaleńnie APB i NPC pa bijaresursach, paviedamlaje sajt ptushki.org.
Uzimku niekatoryja rukakryłyja zastajucca zimavać u Biełarusi i ŭpadajuć u śpiačku. Rytm serca ŭ ich zapavolvajecca, a tempieratura panižajecca. U haradach kažany mohuć zimavać na bałkonach, u padjezdach i čaściakom, paturbavanyja čałaviekam abo ad pierapadaŭ tempieratur, pračynajucca. Heta moža pryvieści da ich hibieli, bo kab pračnucca, kažany traciać amal usiu nazapašanuju enierhiju. Adnavić jaje niama čym: nasiakomych, jakimi charčujucca našyja kažany, uzimku jany nie znojduć. Kab vyratavać rukakryłych, treba znajści dla ich spalnaje miesca i ŭvieści ŭ śpiačku.
«Aptymalnaja temperatura dla zimoŭki kažanoŭ — ad +4 da +8 hradusaŭ. Heta temperatura ŭ zvyčajnym chaładzilniku»
— kaža chirapterołah centra Alaksiej Špak, supracoŭnik NPC pa bijaresursach.
Usie pieradadzienyja ŭ «Kažanapolis» žyvioły buduć praviaracca admysłoŭcami, uzvažvacca, kab vyśvietlić ich stan zdaroŭja, i źmiaščacca ŭ ladoŭniu na zimoŭku. Kali ŭ źviarka vaha panižanaja — jaho daviadziecca padkarmić štučna vyviedzienymi nasiakomymi, inakš jon nie dažyvie da viasny. Viasnoj usich vypuściać u dzikuju pryrodu.
Ratavać kažanoŭ važna, bo rukakryłyja razmnažajucca marudna (samki mohuć naradzić tolki 1-2 kažaniatak u hod).
A heta značyć, što na adnaŭleńnie papulacyj mnohich vidaŭ patrebnyja dziesiacihodździ. Darečy, z 19 vidaŭ kažanoŭ Biełarusi vosiem uklučanyja ŭ nacyjanalnuju Čyrvonuju knihu.
Centry reabilitacyi rukakryłych isnujuć u mnohich krainach, ale ŭ Biełarusi jon źjaviŭsia ŭpieršyniu. «Kažanapolis» paŭstaŭ ź inicyjatyvy Minskaha haradskoha adździaleńnia hramadskaj arhanizacyi «Achova ptušak Baćkaŭščyny» sumiesna z Navukova-praktyčnym centram Nacyjanalnaj akademii navuk Biełarusi pa bijaresursach. Dziakujučy kraŭdfandynhavaj płatformie «MajeSens» prajekt sabraŭ patrebnuju sumu dla zakupki ladoŭni dla centra i inšaha abstalavańnia. Treci partnior inicyjatyvy — Respublikanski centr ekałohii i krajaznaŭstva (RCEK) — padtrymaŭ pryrodaachoŭnikaŭ i vučonych i dazvoliŭ raźmiaścić ladoŭniu ŭ svaim žyvym kutku. U Kažanapolisie pracujuć vałanciory.
«Kažanapolis» funkcyjanuje na bazie RCEK: h. Minsk, vuł. Makajonka, 8.
Kali pabačyš kažana:
— telefanuj +375292139257
— albo pišy na staronku ŭ Fejsbuku: facebook.com/kazhanapolis
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta4
Kamientary