Pieramožcam 8 siezona prajekta «MajstarŠef» na ŭkrainskim kanale STB staŭ 25-hadovy biełarus Ivan Miłanovič. Apošni vypusk kulinarnaha šou vyjšaŭ viečaram 26 śniežnia, piša kp.ua
— Hetyja emocyi ni z čym nie paraŭnać! Ja pracavaŭ nad saboj kožny dzień, kinuŭ raniejšaje žyćcio, prylacieŭ u novuju krainu za niekalki tysiač kiłamietraŭ, kab siońnia padniać kubak pieramožcy!!! Heta nie prosta pieramoha — heta pačatak novaha raździeła ŭ maim žyćci! Ja znajšoŭ novuju spravu, ad jakoj atrymlivaju varjackija kajf, prajšoŭ novy šlach, zdabyŭ novych siabroŭ, kachanaha čałavieka, DOM! Dobraje zaviaršeńnie majho doŭhaha pošuku siabie! — napisaŭ małady čałaviek u svaim instahramie.
Ivan Miłanovič abyšoŭ inšuju supierfinalistku, 51-hadovuju Anžełu Lipskuju. Aboje hatavali ŭ finale try aŭtarskija stravy: asnoŭnuju, zakusku i desiert. Vania, jak daśviedčany padarožnik, u apošni čas žyŭ u ciopłych krainach (naprykład, na Bali), vybraŭ marakanskuju kuchniu. Anžeła, niahledziačy na svajo viehietaryjanstva, hatavała ŭkrainskija stravy.
Za pieramohu ŭ prajekcie Ivan Miłanovič atrymaje 500 tysiač hryŭniaŭ (kala 39 tysiač rubloŭ) i pajedzie vučycca ŭ paryžskuju škołu Le Cordon Bleu. Adnak biełarus užo zajaviŭ, što paśla hetaha choča zastacca ŭ Kijevie. Tym bolš padčas prajekta stała viadoma, što jon znajšoŭ svajo kachańnie — Volhu, jakaja była ŭdzielnicaj inšaha šou na STB «Chałaściak-8» i zmahałasia za ŭvahu śpievaka Raždena. Zaraz dziaŭčyna pracuje na telekanale.
