Na pieršaj paśla atrymańnia tomasa słužbie kiraŭnik Ukrainskaj carkvy maliŭsia ŭ tym liku za patryjarcha Kiryła
Kali mitrapalit Kijeŭski i ŭsiaje Ukrainy Jepifanij słužyŭ pieršuju liturhiju ŭ jakaści pradstajalnika Pravasłaŭnaj carkvy Ukrainy, na Vialikim uvachodzie jon nie pamianuŭ Kiryła Rasijskaha. Paźniej archiŭładyka patłumačyŭ hety svoj učynak tym, što Rasija — varožaja kraina, a Kirył molicca za jaje vojska.
Kamientujučy hety epizod, ja napisaŭ repliku «Mitrapalit Kijeŭski zrabiŭ pieršuju pamyłku»
Pamianuć Kiryła, pisaŭ ja, treba było choć by tamu, što nie ŭsie vierniki Maskoŭskaj Carkvy jak u samoj Rasii, tak i ŭ inšych postavieckich dziaržavach varoža nastaŭlenyja da Ukrainy i aŭtakiefalii PCU. Pamianuć Kiryła treba było i tamu, što sam Isus Chrystos vučyŭ lubić vorahaŭ i błasłaŭlać tych, chto klanie ciabie. Heta jakraz toj vypadak, kali treba być vyšej za kryŭdy i pakazvać: voś jany plavuzhajuć na nas, jany nie žadajuć nam dabra, ale my molimsia za ich. U takim razie novaja Carkva i jaje pradstajalnik buduć nie tolki pakazvać viernaść zapavietam Isusa z Nazareta, ale i maralna stajać vyšej za Kiryła i tych, chto jaho padtrymlivaje va ŭkrainskim pytańni.
Siońnia, na pieršaj liturhii paśla atrymańnia tomasa pra aŭtakiefaliju, Kiryła Rasijskaha mitrapalit Jepifanij pamianuŭ. I heta całkam adpaviadaje adnamu z pałažeńniaŭ tomasa, u jakim jasna zapisana, što pradstajalnik Pravasłaŭnaj Carkvy Ukrainy pavinien za liturhijaj paminać usich pradstajalnikaŭ kananičnych aŭtakiefalnych cerkvaŭ. Peŭna, i Patryjarch Varfałamiej u asabistaj hutarcy źviarnuŭ uvahu maładoha ačolnika PCU na hetaje pradpisańnie.
Toje, što Jepifanij pamianuŭ siońnia Kiryła, nie zastaniecca nie zaŭvažanym kiraŭnikami inšych pravasłaŭnych cerkvaŭ i budzie stanoŭča aceniena va ŭsim chryścijanskim śviecie. Paminańniem Kiryła mitrapalit Kijeŭski i ŭsiaje Ukrainy kaža: jany zyčać nam zła, pasyłajuć nam praklony, zabivajuć našych bratoŭ, a my praciahvajem im aliŭkavuju halinku miru i zaklikajem ich da chryścijanskaj lubovi. Hetym žestam Pravasłaŭnaja Carkva Ukrainy pastaviła siabie vyšej za svaich apanientaŭ i niadobrazyčliŭcaŭ.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary