Andreja Babrova pryzvali na terminovuju słužbu ŭvosień minułaha hodu. Maci sałdata raskazvaje, što zabirali prosta sa špitala, piša Radyjo Svaboda.
Andrej Babroŭ.
Uradženiec Buda-Kašalova Andrej Babroŭ pajšoŭ słužyć u vojska 28 listapada 2018 hodu, trapiŭ u vajskovuju častku numar 18662 30-j asobnaj čyhunačnaj bryhady. Ale prasłužyŭ krychu bolš za dva tydni. 15 śniežnia słužba maładoha sałdata niečakana prypyniłasia.
«Sutarhi, piena z rota»
«Prypadak epileptyčny ŭ mianie zdaryŭsia padčas słužby, — raskazvaje Andrej Babroŭ. — Paśla mianie pakłali ŭ Vajskovy špital. Nie lačyli, heta ž nia lečycca. Ciapier havorać, što kali jašče raz paŭtorycca, to kamisujuć. Adpravim dadomu. A zaraz idzi słužy».
Pa słovach Babrova, takoje ź im zdarajecca nia pieršy raz. Papiaredni byŭ kala hoda tamu, tady jon da medykaŭ nie źviartaŭsia.
«Ja amal ničoha nia pamiataju pra sam prypadak, tolki jak jon pačynaŭsia, — raskazvaje Andrej Babroŭ. — Što adbyvałasia paźniej, nia viedaju. Pamiataju tolki, što padymaŭsia pa leśvicy, potym zakružyłasia hałava, i ŭsio. Aprytomnieŭ tolki, kali vieźli ŭ špital u «chutkaj». Sasłužyŭcy havaryli, što sutarhi byli ŭ mianie, piena z rota išła».
Paśla hetaha vypadku Andrej niekalki dzion pravioŭ u sančastcy pad nazirańniem. 2 studzienia jaho pieraviali ŭ Vajskovy špital u Miensku. Dajuć vitaminy, zrabili encefalahramu. Jana vyjaviła ačah patalahičnaj aktyŭnaści.
«Pastavili dyjahnaz — hieneralizavany prystup, — praciahvaje sałdat. — Jak ja zrazumieŭ, heta adna z klasyfikacyj epilepsii. Nia viedaju, čamu dyjahnaz mienavita taki. Pazvaniŭ maci, jana zvaniła na haračuju liniju Minabarony. Tam adkazali joj, što ŭsio daktary vyrašajuć. Ja zaraz bajusia ŭ častku viartacca z takim dyjahnazam. Kab usio narmalna było, ja b dasłužyŭ. A tak nie razumieju, što budzie. Kali b tady pobač na leśvicy sa mnoj nikoha nie było, nieviadoma što mahło b zdarycca. Urač patłumačyŭ, što prypadak moža paŭtarycca ŭ luby momant. Praz tydzień, praź miesiac. Choć zaraz moža zdarycca».
Na ruki ŭ Vajskovym špitali Andreju nijakich dakumentaŭ, u tym liku ź jahonym dyjahnazam, nie dali. Usio nakiroŭvajuć u častku ŭ Słucak. Sałdat svaich papier nia bačyć. Vypisać Babrova abiacajuć u bližejšyja dni.
«Syna ŭ vojska zabrali amal sa špitala»
«Mnie skazali, što mahu skarhu napisać u Minabarony, — kaža maci Andreja Aksana. — Ja nia viedaju, što budzie. Prypadak moža paŭtarycca, ale ŭrač vyrašyŭ viarnuć jaho ŭ častku. U syna hałava zaŭsiody baleła. I na prysiazie my byli, jon skardziŭsia. A praź niekalki dzion paśla prysiahi mnie sami pazvanili z medčastki, žančyna, i raskazała, što voś takoje zdaryłasia z synam, epilepsija, i Andreja zabrali ŭ Słucak z mocnymi sutarhami. Tam jamu kropielnicu stavili, da 2 studzienia byŭ u Słucku, potym u Miensk pavieźli».
Aksana Babrova kaža, što syn uvohule trapiŭ u vojska pamyłkova. Raskazvaje, što lekar-neŭrolah navat vypisała adterminoŭku, ale heta nie dapamahło.
«Pierad samym pryzyvam u Andreja było strasieńnie mozhu, jon lažaŭ u špitali, — dadaje žančyna. — Pazvanili z vajenkamatu, praź dzień syna vypisali z balnicy, jašče praź dzień zabrali ŭ armiju. Vazili ŭ Homiel, pryznali prydatnym i zabrali».
Paśla vypadku sa strataj prytomnaści ŭ vajskovaj častcy Aksana źviazvałasia z rotnym aficeram syna. Toj pahladzieŭ asabistuju spravu Andreja Babrova i skazaŭ, što ŭ joj ničoha ni pra epilepsiju, ni pra inšyja chvaroby niama. Choć, pa słovach žančyny, jaje syn nieadnarazova atrymlivaŭ adterminoŭki ad słužby praz chvaroby.
Rotny aficer Andreja Babrova kamentavać sytuacyju admoviŭsia.
Praź niekalki dzion paśla taho, jak Andrej źviarnuŭsia da žurnalistaŭ, u jaho zdaryŭsia novy prystup. U častku vajskoviec bolš nie viarnuŭsia.
«Paśla našaj z vami razmovy, praz tydzień zdajecca, u mianie zdaryŭsia druhi prystup, — raskazaŭ Andrej Svabodzie 3 krasavika. — U častku ŭ vyniku ja tak i nie viarnuŭsia, usio adbyłosia ŭ špitali. Mianie kamisavali. Zaraz viarnuŭsia dadomu ŭ Buda-Kašalova, uładkavaŭsia na pracu».
Raskład chvarobaŭ
U Biełarusi zakanadaŭča zamacavany śpis chvarobaŭ, pry jakich pryzyŭnik (albo sałdat terminovaj słužby) moža atrymać peŭny ŭzrovień prydatnaści albo być vyzvaleny ad słužby ŭ mirny ci navat vajenny čas. Heta supolnaja pastanova Minabarony i Minzdaroŭja, jakaja maje aficyjnuju nazvu «Raskład chvarobaŭ». Znajści dakument možna na sajcie pravo.by.
Epilepsija ŭ «raskładzie chvarobaŭ» vyniesienaja ŭ asobny, 21 punkt. Pryzyŭnikoŭ z hetym zachvorvańniem pryznajuć nieprydatnymi da słužby ŭ mirny čas (pry adzinkavych vypadkach epilepsii) albo nieprydatnymi da słužby z vyklučeńniem sa śpisu vajskovaabaviazanych (pry častych vypadkach — try i bolš za hod).
«Najaŭnaść prypadku pavinna być paćvierdžanaja medycynskimi dakumentami, — havorycca ŭ pastanovie. — Taksama mohuć być pryniatyja pad uvahu śviedčańni vidavočcaŭ, kali apisanyja imi prypadak i paślaprypadačny stan dajuć padstavu ličyć prypadak epileptyčnym. U sumnieŭnych vypadkach naležyć zapytvać dadatkovyja źviestki pa miescy žycharstva, vučoby, pracy, prachodžańnia vajskovaj słužby (…)».
Udakładnieńnie. U pieršapačatkovaj versii publikacyi pamyłkova śćviardžałasia, što sałdata vypisali z Vajskovaha špitala i viarnuli ŭ častku.
