Illa Łuchvič — małady biełaruski futbalist, jaki pakul nie dasiahnuŭ ničoha. Byŭ dubloram u «Minsku», paśla nie zmoh prabicca ŭ skład kamandy «Čyść» ź pieršaj lihi, a ŭrešcie zasieŭ u zapasie «Promnia».
Chłopiec prasłaviŭsia nie spartyŭnymi dasiahnieńniami, a tym, što parušaŭ praviły na darahim aŭto i jašče zdymaŭ svaje pryhody na videa, jakoje paśla publikavaŭ u instahramie.
Čytajcie: Futbalist haniaje pa Minsku na darahoj mašynie i fiksuje «podźvihi»-parušeńni ŭ siabie ŭ instahramie VIDEA
Ciapier Illa ŭ milicyi, a jaho baćki ŭ šoku.
Baćka Illi — Alaksandr Łuchvič, były abaronca zbornaj Biełarusi i były trenier «Minska». Jon zrabiŭ niečakany krok — pryjšoŭ u kamienty da naviny pra syna na sajcie «Trybuna» i ščyra vybačyŭsia.
«Naša Niva» raspytała Alaksandra Łuchviča pra hetuju historyju trochi padrabiaźniej.
«NN»: Skažycie, heta sapraŭdy vy pryjšli ŭ kamientary da naviny pra podźvihi syna?
Alaksandr Łuchvič: Tak, ja. Prosta napisaŭ.
«NN»: Atrymlivajecca, vam soramna za toje, što adbyłosia?
AŁ: Tak, kaniečnie. Ja ž baćka. Ja dumaju, u syna chopić rozumu taksama vybačycca. Pakul što jon u milicyi, ja tut taksama. Syn zatrymany, mašynu aryštavali.
«NN»: Skažycie, a čyjo aŭto? Syn sam kupiŭ ci vy padaryli?
AŁ: Mašyna ŭvohule naležyć majoj žoncy. Synu jaje časam davali, kali jamu było treba kudy padjechać. Svajho aŭto ŭ syna nie było.
«NN»: Kažacie, karjera treniera dla vas skončanaja paśla hetych videa.
AŁ: Dumaju, tak.
«NN»: Ale čamu?
AŁ: Kamu patrebnyja skandały? Heta ŭ Rasii šou-biznes i skandały. A ŭ nas nie lubiać šum.
«NN»: Ale hetaja historyja ž zabudziecca. Nu nie praz hod, dyk praz dva.
AŁ: Zabudziecca, kaniečnie. Ale ž asadak zastaniecca.
«NN»: I čym tady budziecie zajmacca, kali nie futbołam?
AŁ: Znajdu čym. Śnieh pajdu čyścić, travu kasić.
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta10
Kamientary