Kruciej, čym u Pussy Riot. Biełaruska zapuściła brend z bałakłavami i ciopłymi aksesuarami FOTY
U Biełarusi źjaviŭsia novy brend aksesuaraŭ — «Era». Jaho zasnavalnica — dyzajnierka Valeryja Sienatarava, jakaja i raspaviała «NN» pra fiłasofiju brenda.
«Bałakłavy — hałoŭny trend siezonaŭ 2018-2019, adnak u Biełarusi ich jašče pradajuć mała. A heta nie prosta modna — najpierš bałakłavy kamfortnyja dla našaha nadvorja: jany vydatna abaraniajuć tvar ad vietru. Ja daŭno dumała nad tym, kab zaniacca vytvorčaściu takich aksesuaraŭ samastojna. I ŭ niejki momant vyrašyła: «Čas pryjšoŭ!» — raspaviała «NN» dyzajnierka.
Valeryi pašancavała: usie jaje blizkija źviazanyja sa śfieraj mody i miedyja, tamu pobač zaŭsiody znachodziacca tyja, chto moža jaje padtrymać i prakansultavać.
Nazva «Era» pryjšła ŭ hałavu dyzajniercy niečakana i adrazu ž zasłaniła saboj usie inšyja varyjanty: «Słova «era» mocnaje, z pasyłam, z vyklikam i navat krychu pieraklikajecca z maim imiem».
Brend zapuściŭsia niadaŭna, zimoj, tamu pakul što ŭsie aksesuary, jakija jany vypuskajuć, akcentavanyja na toje, kab zrabić ludziam ciopła i ŭtulna: snudy, aryhinalnyja šaliki i, kaniečnie, bałakłavy. Adnak vyklučna na hetym asartymiencie dyzajnierka spyniacca nie źbirajecca. Jana pryznajecca, što hałoŭnaje natchnieńnie dla jaje — ludzi, tamu jana budzie pastajanna aziracca na ich patreby.
Usie aksesuary ad «Ery» — ručnoj pracy, stvarajucca na prafiesijnaj viazalnaj mašynie. Praža dla ich zakupajecca ŭ Italii. Rečy nie vyrablajucca masavymi tyražami, tamu kožnaja ź ich — unikalnaja. Ale za luksavaść pryjdziecca dapłacić.
Ci karystajucca bałakłavy popytam u biełarusaŭ?
«Uličvajučy kolkaść štodzionnych zamoŭ, možna zrabić vysnovu, što razumieńnie hetaha trenda da našaj krainy dajšło. Uvohule, u nas chapaje stylnych sučasnych ludziej, jakija nie adstajuć ad jeŭrapiejcaŭ. Urešcie rešt va ŭsich jość mahčymaść pacikavicca apošnimi tendencyjami ŭ internecie. Zrazumieła, što bałakłava nie źjaŭlajecca rečču masavaha spažyvańnia, ale joj abaviazkova pavinna znajścisia miesca ŭ harderobie modnikaŭ i amataraŭ zimovaha kamfortu. Ja ŭpeŭniena, što hety aksesuar z nami nie na adzin siezon», — ličyć Lera.
Z čym možna nasić hety modny aksesuar, hladzicie ŭ instahramie «Ery». Sama ž dyzajnierka ličyć jaho ŭniviersalnym i spałučaje z usimi vobrazami: i kłasičnym palito, i puchavikami, i futram.
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža30
Kamientary