U vyniku darožna‑transpartnaha zdareńnia ŭ Stolinskim rajonie (Bresckaja vobłaść) zahinuli čatyry vajskoŭcaŭ Pinskaha pahraničnaha atrada, 10 — atrymali traŭmy.
Jak paviedamiŭ BiełaPAN načalnik pres‑centra Dziaržaŭnaha pahraničnaha kamiteta Biełarusi Alaksandr Ciščanka, trahiedyja zdaryłasia dniom 18 śniežnia na aŭtadarozie Stolin — Žytkavičy ŭ rajonie Davyd‑Haradka u čas hałalodu. Vadziciel hruzavoha aŭtamabila, jaki pieravoziŭ źmienu pahraničnikaŭ (14 čałaviek) dla niasieńnia słužby na biełaruska‑ŭkrainskaj miažy na Mierlinskim palihonie, nie spraviŭsia z kiravańniem, ź`iechaŭ z trasy i pierakuliŭsia. Zahinuŭ adzin vajennasłužačy terminovaj słužby, dva kantraktniki i adzin praparščyk. Dziesiać vajskoŭcaŭ traŭmavanyja.
Na miescy zdareńnia pracuje hrupa pradstaŭnikoŭ Dziaržpahrankamiteta na čale z namieśnikam staršyni Anatolem Łapo. Staršynia DPK Ihar Račkoŭski pryznačyŭ pa fakcie zdareńnia słužbovaje rasśledavańnie. Raspačata kryminalnaja sprava. Jaje materyjały buduć pieradadzieny ŭ vajennuju prakuraturu.
