U minskim mietro ŭpieršyniu pastaviać biełaruskija eskałatary — z Salihorska FOTA
Na stancyjach treciaj linii mietro ŭstaloŭvajuć eskałatary. Na hetaj vietcy ŭpieršyniu ŭ historyi minskaj padziemki jany buduć ajčynnymi, paviedamlaje The Village.
Raniej u minskim mietro stavili eskałatary ET-5M, vyrablenyja jašče ŭ savieckim Leninhradzie. U 2007 hodzie, kali na «Kastryčnickaj» try staryja stužki eskałatara mianiali na čatyry novyja, zakupili madel JETK-215 z ukrainskaha horada Kramiančuh. U padziemnych pierachodach i handlovych centrach Minska (u tym liku padziemnych) staviać amierykanskija eskałatary Otis i finskija Kone. Na čyhunačnym vakzale niadaŭna zmantavali novyja eskałatary hreckaj kampanii Kleemann. Ale zaraz ich mohuć paciaśnić ajčynnyja eskałatary — z Salihorska.
ZAT «Salihorski instytut prablem resursaźbieražeńnia z doślednaj vytvorčaściu» vypuskaje eskałatary i travałatary. «U 2014 hodzie dla patreb novych stancyj 3-j linii Minskaha mietrapalitena byŭ raspracavany prajekt tunelnaha eskałatara EBT-02M z hłybinioj padjomu ad 3,2 m da 25 m», paviedamlajecca ŭ aficyjnaj historyi kampanii. Salihorskija eskałatary ŭžo stajać na stancyi mietro «Novakrastoŭskaja» ŭ Sankt-Pieciarburhu.
U katałohu firmy znajšlisia rendary eskałataraŭ na budučych stancyjach Minskaha mietro. Chutkaść ruchu pałatna — 0,75 mietra ŭ siekundu, pravaznaja zdolnaść — 8 910 čałaviek u hadzinu. Na «Płoščy Franciška Bahuševiča» buduć dvuchstužačnyja eskałatary, na «Jubilejnaj» i «Vakzalnaj» — čatyrochstužačnyja.
Taksama na vytvorčaści raspracavali i travałatar KPB-02M z daŭžynioj pieramiaščeńnia ad 10 da 100 mietraŭ z chutkaściu ruchu pałatna 0,5—0,75 mietra ŭ siekundu i pravaznoj zdolnaściu ad 7 da 9 tysiač čałaviek u hadzinu. Viadoma, što pamiž stancyjami «Vakzalnaja» i «Płošča Lenina» ŭstalujuć travałatar, ale čyjoj jon budzie vytvorčaści, pakul nie ŭdakładniałasia.
Stancyja «Jubilejnaja».
Stancyja «Vakzalnaja».
Stancyja «Vakzalnaja».
Kamientary