«Abzyvaŭsia «žydami» i zryvaŭ bieł-čyrvona-bieły ściah» — čarhovaja bojka la Kurapataŭ
Uviečary 6 lutaha kala restaracyi «Pojediem pojedim», što ŭstyč da Kurapataŭ, adbyŭsia napad na pikietoŭcaŭ. Pavodle abaroncy Kurapat Paŭła Sieviarynca, napadnik admysłova pryjechaŭ dziela hetaha da restaracyi, piša «Radyjo Svaboda».
«Mužčyna 50-55 hadoŭ pryjechaŭ na šeraj «Maździe», numar nam viadomy. Pačaŭ abražać nas roznymi brydkimi słovami, u tym liku nazyvaŭ «žydami», kazaŭ, što ŭ Kurapatach «žydoŭ» stralali i nas «treba stralać». Nakinuŭsia na pikietoŭca Jurasia Palejku, udaryŭ jaho ŭ tvar, a potym nakinuŭsia na mianie, pačaŭ zryvać ź mianie bieł-čyrvona-bieły ściah. My jaho nie čapali, zaklikali supakoicca. To bok z našaha boku bojki nie było. Tamu i liču, što heta była pravakacyja. Jon jaŭna sprabavaŭ spravakavać nas na niejkuju ahresiju, ale nie ŭdałosia, i tamu źjechaŭ», — skazaŭ Sieviaryniec.
Aktyvist BCHD Juraś Palejka, jaki paciarpieŭ ad napadnika, raspavioŭ pra incydent kala restaracyi:
«Hety čałaviek faktyčna najechaŭ na mianie, ja pavaliŭsia na kapot, ale nijakich paškodžańniaŭ aŭto nie było. Tut jon vyskačyŭ i kinuŭsia bicca, udaryŭ mianie ŭ tvar. Potym nakinuŭsia na inšych pikietoŭcaŭ. Ale samaje dziŭnaje, jak paviali siabie milicyjanty. Tyja, jakija zdymajuć našy pikiety na videa, ani słova jamu nie skazali. Paśla incydentu pryjaždžaŭ jašče narad milicyi, ale ich taksama hety chulihan nie zacikaviŭ, navat nie zapisali numar jahonaha aŭto».
Jury Palejka jašče nia vyrašyŭ, ci budzie padavać u milicyju zajavu na čałavieka, jaki jaho ŭdaryŭ.
«Kali my vyklikajem milicyju, heta skančajecca tym, što na nas ža i składajuć pratakoły. Tamu jašče padumaju, što rabić», — skazaŭ aktyvist.
Pavodle Paŭła Sieviarynca, da incydentu siońniašniaje pikietavańnie restaracyi prachodziła bieskanfliktna.
«My nie zaminajem aŭtamabilam, tolki papiaredžvajem kiroŭcaŭ i naviednikaŭ, što restaran pabudavany niezakonna. Kiroŭcy biaruć ulotki i jeduć dalej. Hetamu treba było inšaje. I pravakacyja, jakuju jon učyniŭ, jaŭna śviedčyć pra toje, što ŭ niekaha zdajuć nervy. Maju na ŭvazie tych, kaho złuje praŭda pra Kurapaty, u tym liku našy patrabavańni raskryć archivy i nazvać imiony rasstralanych. Adsiul hetyja pahrozy i abrazy», — miarkuje Pavał Sieviaryniec.
Piać faktaŭ pra Natallu Piatkievič — samuju ŭpłyvovuju čynoŭnicu Biełarusi da źjaŭleńnia Kačanavaj i Ejsmant24
Kamientary