Alaksandra Druzia i Illu Biera adchilili ad udziełu ŭ «Što? Dzie? Kali?» i «Chto choča stać miljanieram?»
Hałoŭny redaktar prahramy «Chto choča stać miljanieram?» Illa Bier i znatok Alaksandr Druź adchilenyja na niavyznačany termin ad udziełu ŭ pieradačach «Što? Dzie? Kali?» i «Chto choča stać miljanieram?» u suviazi z uzajemnymi abvinavačvańniami pra podkup.
Pra heta havorycca ŭ zajavie Pieršaha kanała, raspaŭsiudžanaj u piatnicu, paviedamlaje TASS.
«Reputacyjnaja škoda naniesiena… telehulni «Što? Dzie? Kali?» i Pieršamu kanału jak viaščalniku. U hetaj situacyi kiraŭnictva Pieršaha kanała padtrymlivaje rašeńnie kampanij-vytvorcaŭ ab adchileńni Illi Biera i Alaksandra Druzia ad dalejšaha ŭdziełu ŭ prahramach «Chto choča stać miljanieram?» i «Što? Dzie? Kali?».
«Situacyja padviała viaščalnika, prahramu, usich, chto na joj pracuje, i našych ni ŭ čym nie vinavatych hledačoŭ, jakija hladzieli toj vypusk «Miljaniera». My vielmi cenim prafiesijnyja jakaści Illi Biera, adnak ličym pravilnym adchilić jaho ad pracy ŭ prahramie na niavyznačany termin», — cytuje pres-słužba hiendyrektara telekampanii «Čyrvony Kvadrat» Illu Kryvickaha (vytvorca «Chto choča stać miljanieram?»).
Illa Bier zajaviŭ, što pierad zapisam vypusku «Chto choča stać miljanieram?» u listapadzie 2018 hoda Alaksandr Druź paprasiŭ jaho vydać adkazy na pytańni ŭ abmien na dolu ad vyjhryšu ŭ try miljony rasijskich rubloŭ (kala 100 tysiač biełaruskich).
Bier śćviardžaje, što pradyktavaŭ Druziu adkazy na čatyry z 15 pytańniaŭ, kab dakazać fakt machlarstva. Jon abvinavaciŭ znataka ŭ nieetyčnych pavodzinach i prapanavaŭ adchilić jaho ad arhanizacyi turniraŭ «Što? Dzie? Kali?» i ŭdziełu ŭ hulni.
Druź admaŭlaje abvinavačvańni, jon zajaviŭ, što na niesumlennuju hulniu jaho sprabavaŭ spravakavać mienavita Bier. Pa słovach Druzia, jon vyrašyŭ pahladzieć, «nakolki daloka moža pajści hety čałaviek». «I čałaviek pajšoŭ dalej: pačaŭ abmiarkoŭvać detali ździełki, u čym ja staranna jamu padyhraŭ», — skazaŭ Druź.
Jon śćviardžaje, što raspavioŭ pra situacyju inšamu znataku «Što? Dzie? Kali?» Viktaru Sidnievu, jaki pavinien byŭ udzielničać ź im u prahramie «Chto choča stać miljanieram?» (Sidnieŭ heta paćvierdziŭ). Jany vyrašyli, što daviaduć hulniu da apošniaha pytańnia, śpiecyjalna adkažuć na jaho niapravilna, a paśla zdymak paskardziacca na Biera kiraŭnictvu pieradačy.
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža31
Kamientary