Rasija źniščyła paškodžanyja pry transpartavańni rakiety dla kompleksaŭ C-400, jakija pradała ŭ Kitaj. Pra heta 18 lutaha paviedamiŭ kiraŭnik rasiejskaj dziaržaŭnaj karparacyi «Rostiech» Siarhiej Čemiezaŭ, paviedamlaje Radyjo Svaboda.
Pa słovach čynoŭnika, sudna, jakoje pieravoziła rakiety, trapiła ŭ štorm. Macavańni, jakija trymali abstalavańnie, nia vytrymali, i jano mocna paškodziłasia.
Čemiezaŭ zajaviŭ, što Rasija vyrablaje novyja rakiety dla Kitaja. Suma kantrakta na pastaŭku šaści dyvizijonaŭ S-400 składaje bolš za try miljardy dołaraŭ. Pra pačatak pastavak abviaścili ŭ studzieni 2018 hoda.
U vieraśni 2018 hodu Złučanyja Štaty ŭviali sankcyi suprać Ministerstva abarony KNR za kuplu 10 rasijskich źniščalnikaŭ Su-35 i zienitna-rakietnych kompleksaŭ S-400.
Kitaj staŭ pieršaj krainaj, u jakoj ZŠA ŭžyli abmiežavańni za supracoŭnictva z Rasijaj.
Raniej paviedamlałasia, što Rasija i Indyja zaklučyli kantrakt na pastaŭku piaci dyvizijonaŭ zienitna-rakietnych kompleksaŭ S-400. Kantrakt koštam bolš za 5 miljardaŭ dołaraŭ zaklučany ŭ čas vizitu ŭ Deli prezidenta Rasiei Ŭładzimira Pucina vosieńniu 2018 hodu. Za kuplu rasiejskaha ŭzbrajeńnia Indyi mohuć pahražać sankcyi z boku ZŠA.
Zienitna-rakietnyja kompleksy S-400 pryznačanyja dla źniščeńnia srodkaŭ pavietrana-kaśmičnaha napadu. Ich rakiety mohuć paražać aeradynamičnyja celi na vyšyniach da 27 kiłamietraŭ, a balistyčnyja celi — da 25 kiłamietraŭ.
Kamientary