Śledčy kamitet: U Biełarusi nie było zdareńniaŭ, źviazanych z hulnioj «Moma»
Paśla trahiedyi ŭ Minsku, kali z akna šmatpaviarchovika vypała piacikłaśnica, u baćkoŭskich vajbier-čatach stali źjaŭlacca paničnyja paviedamleńni. Praktyčna identyčnyja pa źmieście, jany raskazvali pra datyčnaść da śmierci dziaŭčynki niejkaj hulni «Moma», jakaja virusna raspaŭsiudžvajecca ŭ miesiendžarach, piša Jeŭraradyjo.
Aficyjny pradstaŭnik Śledčaha kamiteta Siarhiej Kabakovič raskazaŭ Jeŭraradyjo, što nie varta paddavacca na takoha kštałtu infarmacyjnyja ŭkidy:
«Usim, chto raspaŭsiudžvaje i čytaje hetyja čutki ŭ roznych čatach, ja rekamienduju tolki adno: nie vieryć hetym čutkam, jakija tam raspaŭsiudžvajucca. Bo chto-niebudź ź dziaciej čytaje hetyja baćkoŭskija čaty, i znoŭ ža atrymlivaje infarmacyju, što niejkaja hulnia ŭ nas nibyta prysutničaje. A z nahody padobnych hulniaŭ ja skažu tak: dzieci daŭnym-daŭno ŭsio pračytali, usio viedajuć, a baćki «bić pa chvastach» tolki pačynajuć».
Što tyčycca zdareńnia ź piacikłaśnicaj, to pakul śledstva nie skončyłasia i kazać pra pryčyny taho, što adbyłosia, rana. Pradstaŭnik SK padkreślivaje: na siońnia nijakich trahičnych vypadkaŭ, źviazanych z hulnioj «Moma», u Biełarusi nie zarehistravana.
«Śledčyja dziejańni i pracesualnyja mierapryjemstvy pa toj trahičnaj nahodzie jašče praciahvajucca. Śledčyja raźbirajucca va ŭsich akaličnaściach zdareńnia, — tłumačyć Siarhiej Kabakovič. — Na terytoryi Biełarusi, pa mienšaj miery, na siońniašni čas, jakich-niebudź vypadkaŭ, u tym liku trahičnych, źviazanych z tak zvanaj hulnioj «Moma», nie zarehistravana».
«Baćkam treba ŭdumliva i z razumieńniem stavicca da taho, što dzicia robić u sacsietkach»
Ludziam, jakija raspaŭsiudžvajuć paviedamleńni pra datyčnaści hulni «Moma» da hibieli školnicy, aficyjny pradstaŭnik SK parekamiendavaŭ dumać, što jany robiać:
«Ludzi jakija raspaŭsiudžvajuć hetyja čutki, hetuju achinieju, pavinny być aściarožnymi z takimi rečami, tamu što heta vyklikaje čarhovy vał. Jak užo było pra cukierki ź psichatropami, jakija nibyta raspaŭsiudžvali. Abo pra ščaniukoŭ, jakich vykidvali z mašyny, kab nibyta vykradać dziaciej na vulicy.
My razumiejem, što baćki takim čynam chočuć pryciahnuć uvahu hramadskaści, kab ludzi bolš sačyli za svaimi dziećmi», — kaža jon, ale rekamienduje baćkam bolš źviartać uvahi na toje, što robiać ich dzieci ŭ sacsietkach, prysutničać tam i vybudoŭvać davierlivyja adnosiny sa svaim dziciom.
«Rekamiendacyi prostyja. Pieršaje: nie viercie čutkam, jakija raspaŭsiudžvajucca. Druhoje: takich trahičnych vypadkaŭ, źviazanych nibyta z raspaŭsiudžvańniem hulni, u nas nie zarehistravana. Treciaje: idzicie razam ź dziećmi ŭ sacyjalnyja sietki, viedajcie, što robić tam dzicia. Baćkam treba ŭdumliva i z razumieńniem stavicca da taho, što dzicia robić u sacsietkach. Heta pavinna być na padstavie davieru da baćkoŭ, i tady ŭsio budzie ŭ paradku. Čaćviortaje: navučycca samim baćkam pavodzić siabie pravilna ŭ sacsietkach. Baćki čaściakom sami ŭ sacsietkach znachodziacca dziela zabavy, i vielmi časta nie ŭmiejuć siabie tam pavodzić. A potym my hladzim na našych dziaciej. Jany ž biaruć prykład z baćkoŭ.
Bolš uvahi treba źviartać nie na niejkija nibyta hulni, a na toje, z kim dzicia kantaktuje. Jość masa inšych vypadkaŭ. Toj ža hruminh. Abrazy i ckavańnie dziaciej u sacsietkach, u pablikach i čatach, dzie jany kantaktujuć».
U Momo hulajuć praź miesiendžary, naprykład Viber abo WhatsApp. Strašnaja japonskaja lalka dadajecca da dziciaci ŭ kantakty i zahadvaje pisać joj, a inakš pahražaje praklonami. Momo moža telefanavać i pieradavać strašnyja huki, patrabavać patelefanavać joj i dasyłać malunki i videa sa scenami hvałtu.
Mieksikanskaja palicyja pryjšła da vysnovy, što heta ŭsio robicca, kab skraści piersanalnyja dadzienyja ŭładalnika smartfona, u Rasii hulniu źviazali z sumna viadomym «Sinim kitom». A ŭ Biełarusi pra Momo da niadaŭniaha času nie čuli.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ23
Kamientary