Historyja pra maładych hrodziencaŭ z dubinkami, jakija patrulavali vulicy Hrodna 23 lutaha, vyklikała abureńnie ŭ sacyjalnych sietkach. Mnohich cikaviła, čamu padletki vychodziać u centr horada sa śpiecsrodkami. Situacyju prakamientavali pieršy sakratar Hrodzienskaha abkama HA BRSM Pavieł Marchaluk i pravaabaronca Uładzimir Chilmanovič, piša Hrodna.life.
Pry sustrečy maładyja hrodziency pradstavilisia žurnalistu Hrodna.life bajcami MAAP. Raspaviali, što dapamahajuć milicyi. Na chłopcach byli kamuflažnyja štany, dubinki, bejdžy z paśviedčańniami i adna kamiera na dvaich. Abrevijatura MAAP rasšyfroŭvajecca jak Moładzievy atrad achovy pravaparadku.
Pieršy sakratar Hrodzienskaha abkama HA BRSM Pavieł Marchaluk raspavioŭ Hrodna.life, što dziejnaść usich atradaŭ MAAP (uvachodzić u strukturu BRSM) u horadzie rehłamientavana dakumientami, zhodna z narmatyŭna-pravavoj bazaj. Chłopcy, jakija vyjšli ŭ centr Hrodna 23 lutaha z dubinkami prajavili ŭłasnuju inicyjatyvu.
«Chłopcy z dubinkami nie pavinny chadzić pa horadzie, ich im nie vydajuć, heta była asabistaja inicyjatyva, — raspaviadaje Pavieł Marchaluk. — Maładyja chłopcy nie da kanca zrazumieli, jak pravilna vykazać svoj udzieł u atradach achovy pravaparadku. Budziem pracavać ź imi i ŭsio staranna tłumačyć».
Ranicaj 25 lutaha z padletkami ŭžo była praviedzienaja razmova. U budučyni z usimi aktyvistami budzie pravodzicca dadatkovy instruktaž: što možna rabić na dziažurstvie, a čaho nielha.
«Chłopcaŭ, jakija prajavili svaju inicyjatyvu, nichto karać nie budzie. Dzieści ź imi niedapracavali pa tłumačeńni dziejnaści atrada achovy pravaparadku. Z adnaho boku, heta moža być i dobra, što jany vychodziać na vulicu i prajaŭlajuć svoj hramadzianski abaviazak u takoj formie, ale inicyjatyva pavinna być pravilnaja».
Hrodzienski pravaabaronca Uładzimir Chilmanovič ličyć, što našeńnie dubinak i ich prymianieńnie pradstaŭnikami MAAP niezakonna.
«Pa-pieršaje, treba vyśvietlić, što heta za struktura MAAP. Jak ja razumieju, chutčej za ŭsio jurydyčna jana nie zarehistravanaja, a značyć niezakonnaja. Humovyja dubinki heta śpiecsrodki, ich užyvańnie rehuluje artykuł 28 Zakona Ab orhanach Unutranych Spraŭ i artykuł 20 Zakona Ab unutranych vojskach. Nijakaha dačynieńnia BRSM, jak hramadskaja arhanizacyja, jakaja stvaryła hetyja MAAP, da orhanaŭ unutranych spraŭ i ŭnutranych vojskaŭ nie maje. Tamu našeńnie takich dručkoŭ i tym bolš ich užyvańnie niezakonna.
Prakuratura horada pa fakcie takoha patrulavańnia pavinna pačać pravierku», — padzialiŭsia mierkavańniem pravaabaronca.