Mnohija pahadžajucca ŭ tym, što administracyjnaja reforma Biełarusi daŭno naśpieła. Na vybarach 2010 hoda niekalki kandydataŭ, naprykład, Aleś Michalevič i Vital Rymašeŭski, navat uzdymali hetaje pytańnie.
Pakul ułady nie navažylisia na drobleńnie abłaściej, ale ŭžo siońnia možna było b admovicca ad niekatorych rajonaŭ. Na siońnia ŭ Biełarusi naličvajecca 118 rajonaŭ. Jakija administracyjnyja centry možna skasavać najbližejšym časam, kab źmienšyć kolkaść čynoŭnikaŭ, zekanomić hrošy i pačać ruchacca ŭ bok bolš hłabalnaj reformy.
Adrazu skažam, što havorka tut nie pra samyja małyja pa nasielnictvie rajony. Naprykład, ciažka budzie rasfarmiravać Rasonski rajon. Ad jaho dastatkova daloka da inšych centraŭ. Tak što ŭličvać budziem nie tolki hetyja faktary.
Rajonnyja centry raźmieščanyja ŭ ałfavitnym paradku.
Bierastavicki rajon (15 440 čałaviek pa stanie na 2018 hod)
Znak u Vialikaj Bierastavicy. Fota ź Vikipiedyi.
Hety rajon byŭ utvorany ŭ 1940 hodzie, adrazu pa dałučeńni Zachodniaj Biełarusi da BSSR. Tolki tady jon mieŭ nazvu Krynkaŭski (tak, tyja samyja Krynki, dzie žyŭ Sakrat Janovič) i byŭ zusim nie pamiežny. Adnak paśla vajny ładnaja častka rajona stała terytoryjaj Polščy. Na siońnia Bierastavicki rajon adzin z samych małych u krainie. Za apošnija 23 hady jaho nasielnictva skaraciłasia na čverć. Pry hetym doŭhi čas dadzieny rehijon zajmaŭ viadučyja miescy ŭ krainie pa ŭradžajnaści. Adlehłaść ad Vialikaj Bierastavicy da Vaŭkavyska składaje 36 kiłamietraŭ.
Biešankovicki rajon (15 469)
Biešankovicki aŭtavakzał. Fota fotobel.by.
Vuzki i pradaŭhavaty rajon va ŭschodniaj častcy Viciebskaj vobłaści. Z hetaj terytoryi rodam kancler VKŁ Leŭ Sapieha, a taksama ministr abarony Biełarusi Andrej Raŭkoŭ. Adnak na siońnia Biešankovicki rajon zajmaje čaćviortaje miesca źnizu pa ŭzroŭni zarobkaŭ u krainie. Za hady kiravańnia Łukašenki nasielnictva tut taksama źmienšyłasia na tracinu. Biešankovicki rajon možna było b spakojna padzialić miž Šumilinskim, Sieńnienskim, Čašnickim i Viciebskim.
Voranaŭski rajon (24 911)
Kaścioł Božaj Miłasernaści ŭ Voranavie. Fota: Wikipedia.
Kaliści Voranaŭski rajon pryrastaŭ za košt inšaha. U 1962 hodzie da jaho byŭ dałučany Radunski rajon, jaki skasavali za niepatrebnaściu. U Voranaŭskim rajonie naradziŭsia adzin z hałoŭnych paplečnikaŭ Łukašenki — Viktar Šejman, chacia jahony rod z histaryčnaj Navahradčyny. Voranaŭski rajon unikalny tym, što bolš za 80% miascovaha nasielnictva ŭvažajuć siabie za palakaŭ. Zrešty, u Lidskim rajonie, da jakoha my prapanujem dałučyć Voranaŭski, palakaŭ nie našmat mieniej.
Drybinski rajon (9661)
Haścinica ŭ Drybinie. Fota belhotel.by.
Užo dvojčy ŭ historyi ŭłady likvidoŭvali Drybinski rajon — u 1931-m i 1959-m. Adnak u 1989-m Drybin znoŭ staŭ administracyjnym centram u suviazi z masavym pierajezdam u rehijon žycharoŭ Krasnapolskaha rajona, jaki trapiŭ na zabrudžanyja radyjacyjaj terytoryi. Nasielnictva rajona składaje ŭsiaho 12 tysiač žycharoŭ. Hety rajon traplaje ŭ śpisy tych rehijonaŭ, jakija najchutčej vymirajuć. Drybinski rajon možna było b padzialić miž Horackim, Škłoŭskim i Mścisłaŭskim.
Jelski rajon (15 128)
Jelsk z vyšyni. Fota fotobel.by.
Ci šmat vy čujecie navin ź Jelskaha rajona? Apošniaje, što ŭspaminajecca, jak tudy ź Minska vyvieźli aktyvistak Femen. A kaliści Jelskam vałodali vychadcy z Francyi, šlachiecki rod Spadaŭ. A sam nasieleny punkt nazyvaŭsia Karalin. Tolki ŭ 1931-m hodzie Karalin staŭ Jelskam, a jašče praź siem hadoŭ atrymaŭ status pasiołku haradskoha typu. Admietna, što ŭ 1960-ja ad Jelskaha rajona adłučyŭsia Naraŭlanski. Nasielnictva Jelskaha rajona imkliva źmianšajecca. Padzieleny rajon moh by być miž Mazyrskim, Lelčyckim i Naraŭlanskim.
Žabinkaŭski rajon (24 329)
Stancyja Žabinka. Fota railwayz.info.
Ad Žabinki da Bresta mienš za 30 kiłamietraŭ. Žabinkaŭski rajon bahaty vytvorčaściu: tam majecca cukrovy zavod, kambikormny, torfabrykietny. Nasielnictva jaho taksama nie źmianšajecca, ale vializnaja kolkaść ludziej prosta jeździć na pracu ŭ Brest. Čamu b rajon i aficyjna nie zamacavać za abłasnym centram?
Kapylski rajon (27 901)
U centry Kapyla. Fota euroradio.fm.
Vyhladaje ci nie samym słabym rajonam Minskaj vobłaści. Nasielnictva rehijona źmianšajecca vielmi imkliva. U horadzie faktyčna niama nijakaj bujnoj vytvorčaści, aproč zavoda słuckich syroŭ. Kapylščyna bahaty kulturna i histaryčna rehijon: tut prachodziła Słuckaje paŭstańnie, pra rajon pisaŭ Kupała, tut naradzilisia Kuźma Čorny i Aleś Adamovič. Ale na siońnia Kapylu patrebnaja ci mocnaja pierazahruzka, ci likvidacyja. Rajon moža być padzieleny miž Salihorskim, Słuckim, Stoŭbcoŭskim, Niaśvižskim.
Karmianski rajon (13 213)
Na centralnaj płoščy Karmy. Fota gp.by.
U Karmianskaha rajona taksama niaprostaja historyja. Jaho pieradavali, to da Rahačoŭskaha, to da Čačerskaha. Rajon vielmi mocna paciarpieŭ ad nastupstvaŭ avaryi na ČAES. Kab Karma zastałasia ŭ miežach Homielskaj vobłaści, to rajon moh być padzieleny ŭsio pamiž tymi samymi Rahačoŭskim i Čačerskim rajonami. Heta druhi samy biedny rajon u krainie. Letaś siarednija zarobki tam składali ŭsiaho 524 rubli.
Karelicki rajon (19 691)
Fest la Mirskaha zamka. Fota dili.by.
Pieršym administracyjnym centram hetaha rajona było miastečka Valeŭka, ciapier jana ahraharadok i ŭvachodzić uvohule ŭ skład Navahrudskaha rajona. U 1962-m Karelicki rajon užo likvidoŭvali, u 1965-m — adnavili. Karelicki rajon źjaŭlajecca abjektam cikaŭnaści turystaŭ ź Biełarusi i zamiežža, bo tut znachodzicca Mirski zamak. U vypadku reformy albo ŭ Niaśvižskim rajonie, albo ŭ Navahrudskim paboleje histaryčnych słavutaściaŭ.
Kiraŭski rajon (19 106)
Kiraŭsk rychtujecca da abłasnych Dažynak. Fota mogilevnews.by.
Hety rajon utvaryli, uziaŭšy pakrychu ŭ Babrujskaha, Kličaŭskaha, Bychaŭskaha i Rahačoŭskaha. Nazva rajonnaha centra absalutna štučnaja, jaho nazvali ŭ honar pieršaha sakratara Leninhradskaha abkama Siarhieja Kirava. Raniej nasieleny punkt na hetym miescy nazyvaŭsia Starcy. U Kiraŭskim rajonie byŭ niekali lehiendarny kałhas «Rasśviet», jakim kiravaŭ Vasil Staravojtaŭ. Na siońnia asablivaha sensu ŭ isnavańni asobnaj administracyjnaj adzinki z centram u Kiraŭsku niama.
Kruhlanski rajon (13 827)
Pomnik rasijskamu hienierału Čarniajevu ŭ Kruhlanskim rajonie. Fota tvmogilev.by.
I ŭ dačynieńni da Kruhlanskaha rajona likvidacyja była b zusim nie pieršaj: rajon skasoŭvali ŭžo dvojčy, ale potym adnaŭlali. U Kruhlanskim rajonie jość pomnik ruskamu hienierału, redaktaru haziety «Ruski mir» Michaiłu Čarniajevu, jaki žyŭ tut naprykancy XIX stahodździa. Rajon nievialiki, stratehičnaha značeńnia nie maje, i moža być lohka padzieleny miž Škłoŭskim, Krupskim i Tałačynskim rajonami.
Loźnienski rajon (15 734)
Takim Lozna bačyŭ Mark Šahał.
Kaliści tut byŭ zrobleny zamach na pieršaha prezidenta Biełarusi, tady, praŭda, jašče kandydata ŭ prezidenty. A na siońnia Loźnienski rajon — adzin z samych imkliva vymirajučych u krainie.
Moža być padzieleny miž Viciebskim, Aršanskim i Dubrovienskim rajonami.
Łojeŭski rajon (11 799)
Tanki ŭ Łojevie. Fota fotobel.by.
Zajmaje piataje miesca siarod samych biednych rajonaŭ krainy. Chacia tut prachodzić miaža z Ukrainaj, praciakaje Dniapro. Łojeŭ nie staŭ pryciahalnym centram dla žycharstva. Rajon moža być padzieleny miž Rečyckim i Brahinskim.
Lachavicki rajon (25 436)
Zabudova XIX stahodździa ŭ Lachavičach. Fota radzima.org.
U Lachavičach jość małakazavod, vyrablajuć kansiervy, robiać brykiet, apracoŭvajuć lon. Heta zusim nie samy depresiŭny rajon Biełarusi, ale zusim blizkaje hieahrafičnaje raźmiaščeńnia ad Baranavičaŭ robić Lachavickuju administracyjnuju adzinku nie zusim metazhodnaj u siońniašniaj Biełarusi.
Šarkaŭščynski rajon (14 781)
Centralnaja rajonnaja balnica ŭ Šarkaŭščynie. Fota shcrb.by.
Viadomy najpierš tym, što aficyjna źjaŭlajecca samym biednym rajonam krainy. Heta adziny rehijon, dzie zarobki letaś byli mienšymi za 500 rubloŭ. U Šarkaŭščynskim rajonie jość fantastyčna pryhožy zakaźnik «Jelnia», ale šmat na turyźmie zarablać tam jašče nie navučylisia. Pradpryjemstvy rajona ž znachodziacca nie ŭ samym dobrym stanie. Padzialić rajon možna było b miž Brasłavam, Hłybokim i Pastavami.
