«Šmat razoŭ davodziłasia bačyć, jak žanich płača». Viasielnaja rehistratarka — pra fors-mažory ŭ šlubnych cyrymonijach
«Našaj Ninie» viasielny rehistratar Alena Prucik adkazała na samyja papularnyja pytańni, jakija joj davodzicca čuć jak ad maładzionaŭ, tak i ich haściej, padzialiłasia vypadkami, jakija ciažka praduhledzieć padčas navat samaj pradumanaj cyrymonii, i raspaviała, što ž budzie modnym u siezonie-2019.
Minčancy Alenie Prucik 25 hadoŭ. Alena skončyła ekanamičny fakultet i piać hadoŭ adpracavała pa śpiecyjalnaści, padparadkujučysia raskładu dnia i strohamu dres-kodu.
Ale raptam u adzin dzień jana vyrašyła, što siabie nie padmanieš i što kvietki, muzyka, pryhažość bolš vabiać dziaŭčynu, čym ličby i dakumienty.
«Pa ščyraści pryznacca, ź viasiellami ja była źviazanaja ź dziacinstva. Tata ihraŭ na viasiellach, mama była viadučaj. Paśla ja vyvučyłasia na fłarysta i zajmałasia stvareńniem viasielnych bukietaŭ. Ale ŭvieś čas dumała pra toje, što ja zajmajusia nie tym, pra što maryła. I niejak vypadkova trapiła na abjavu pra toje, što zaprašajuć na kursy viasielnych rehistrataraŭ. Ale viasielny rehistratar — heta nie tolki śviata, heta vialikaja i adkaznaja praca».
I voś užo hod Alena pravodzić uračystyja cyrymonii. Za hety čas jana raśpisała kala 50 par. Ale voś jakija pytańni pieryjadyčna ŭźnikajuć u novych i novych par.
«Našto jašče raz rehistravać šlub, kali jość ZAHS?»
Daty ŭračystaj rehistracyi šlubu i data štampa ŭ pašparcie buduć adroźnivacca. I mnohija nie razumiejuć, našto ładzić «pakazuchu», kali vy ŭžo atrymali zapavietny dakumient.
U hetym, śćviardžaje Alena Prucik, i jość roźnica ŭ tym, što cyrymoniju pravodziać admysłova padrychtavanyja rehistratary, a nie «ciotačka ŭ ZAHSie», u jakoj taki ŭračysty momant pastaŭleny na kanviejer.
Alena raskazvaje, što z paraj znajomicca zadoŭha da ŭračystaści. Paśpiavaje paznajomicca, daviedacca pra ich historyju, zrazumieć, čaho čakajuć ad cyrymonii maładziony. Kožny momant raśpisvajecca da padrabiaznaściaŭ.
Akramia taho, rehistratar padbiraje muzyku i pradumvaje toje, što budzie adbyvacca padčas rehistracyi da drabiazy: i parasony na vypadak daždžu, i pledy na vypadak mocnaha vietru, i skrynački dla piarścionkaŭ, i tečki dla słovaŭ žanicha i niaviesty.
«U mianie byŭ vypadak, kali padušačku ź piarścionkami z-za mocnaha vietru prosta znosiła. I kab nie skrynačka, jakuju ja našu z saboj, momant byŭ by bieznadziejna sapsavany, a tak ja chutka vypraviła situacyju», — raskazvaje Alena.
Jakija zdarajucca fors-mažory? I jak vychodzić ź niepraduhledžanaj situacyi?
Situacyja, jakuju ciažej za ŭsio sprahnazavać, viadoma, źviazanaja z nadvorjem.
«Zdajecca, i prahnoz pahladziš, a tut viecier ci prosta choład sabačy. Što datyčycca ludskoha faktaru, to byvaje, što hości pierad cyrymonijaj paśpiavajuć vypić lišniaha. Vielmi nie lublu takija momanty. Tamu ja prašu žanicha i niaviestu nie padavać na furšet mocnyja śpirtnyja napoi», — kaža Alena.
Zdarałasia ŭ praktycy rehistratara i takoje, što dźvie pary prosta admianili ŭračystaść za niekalki dzion da jaje. U pieršym vypadku para vymušanaja była admianić viasielle z-za chvaroby svajaka. U druhim vypadku — maładziony zrazumieli, što robiać pamyłku.
«Što za tryźnieńnie: niaviestu zabirać z numara hatela? Siabrovak apranać u adnolkavaje? Zamaŭlać aŭtarskija torty?»
«Takija pytańni čaściej za ŭsio zadajuć baćki maładych, — raskazvaje rehistratar, — u nas vielmi tradycyjnyja madeli viasiellaŭ, i ŭsio toje, što vybivajecca z tradycyi, vyklikaje supraciŭ. Čamuści mamy ličać, što treba, kab niaviestu žanich zabiraŭ z domu. Ale ž na pamiać zastanucca fotazdymki z pryhožaha miesca, a nie z padjezda šmatpaviarchoŭki.
Mnohija da siońnia nie razumiejuć, što vykup niaviesty — heta pieražytak minułaha, što heta biantežyć žanicha i hladzicca jak minimum niedarečna.
Maja zadača, jak rehistratara, zrabić usio mahčymaje, kab było pryhoža. Nieabaviazkova siabrovak apranać u adnolkavyja sukienki, možna prosta padabrać im aksesuar u adzinym styli, — kaža Alena, — ale kali jany nie harmanirujuć z zonaj rehistracyi, ja prosta prapanuju pary być kala zony rehistracyi ŭdvaich. Bieź siabroŭ. Siabry padtrymlivajuć razam z astatnimi haściami. Plus byŭ vypadak, kali siabar žanicha pastajanna hučna kašlaŭ i adciahvaŭ ŭsich haściej — jon ža stajaŭ pamiž mnoj i žanichom».
«Chaču viasielle pa-biełarusku»
«Ja b vielmi chacieła pravieści cyrymoniju pa-biełarusku. Tym bolš što ja rehistratar, jaki śpiavaje», — pryznajecca Alena Prucik.
«Mužčyny nie płačuć»?
Tolki nie na viasielnych cyrymonijach.
«Moj lubimy momant na ŭsich viasiellach — heta momant źjaŭleńnia niaviesty. Tut emocyi zaškalvajuć va ŭsich. I ŭ pieršuju čarhu ŭ žanicha. Šmat razoŭ davodziłasia bačyć, jak žanich płača. I havorka nie pra skupuju mužčynskuju ślazu. Chacia emocyi roznyja. Mamy niaviest, pryznacca pa ščyraści, płačuć značna čaściej, čym žanichi. A budučyja mužy mohuć i radavacca, i raśśmiajacca. Usio vielmi indyvidualna».
«Što budzie modnym u siezonie 2019?»
1. Viačerniaja cyrymonija. Rehistracyja šlubu pad zorami i lichtarami.
2. Minimalizm. Mienš dziejańniaŭ, bolš dušy i svabody. Raźvitvajemsia ź lišnimi dapaŭnieńniami. ⠀
3. Žyvy huk. Asablivy dzień z asablivaj muzykaj.
4. Viasielnyja kancepcyi ŭ ciomnych tanach. Cyrymonija stanovicca śmialejšaj, adkryvajecca novamu. Takija viasielli majuć svoj šarm i styl.
5. Kamiernaść. Kali dalokija svajaki z Mahadana pačakajuć. Hety trend tolki ŭzmacniajecca z kožnym hodam. Tolki samyja blizkija, a časam śviata naohuł dla dvaich.
6. Ekałahičnaść. Tolki žyvyja kvietki, maksimalnaja nabližanaść da pryrody, mahčymaść vykarystańnia pryrody ŭ jakaści najlepšych dekaracyj. ⠀
7. Indyvidualnaść. Nie tak, jak u «Mašy z buchhałteryi». Bolš unikalnaści na cyrymonii, addaleńnie ad ramak šlubu. Raźvitvajemsia z aktami, uručeńniem paśviedčańniaŭ, admaŭlajemsia ad podpisaŭ śviedak.⠀
8. Industryjalnyja cyrymonii. Niezvyčajnyja rašeńni dla placovak, stylnyja łofty, dachi damoŭ i mnostva inšych varyjantaŭ dla cyrymonij u horadzie — nul pieražyvańniaŭ za nadvorje, maksimum mahčymaściaŭ.
Na parłamienckich vybarach u Francyi pieramahajuć ultrapravyja z Maryn Lo Pen. Partyja Makrona treciaja5
Kamientary