Palityk Anatol Labiedźka paviedamiŭ «Našaj Nivie», što jon i jašče šerah deputataŭ 12-ha i 13-ha sklikańniaŭ chočuć stvaryć hramadskuju arhanizacyju, jakaja takich ludziej abjadnaje.
Nazvacca chočuć «Deputackim kłubam».
Heta nie vynachodnictva rovara, kaža Labiedźka, bo sietka takich kłubaŭ isnuje ŭ inšych krainach: deputaty, čyja kadencyja skončana i dalej jany nie bałatujucca, ale chočuć jašče ŭžyć svoj dośvied, abjadnoŭvajucca ŭ takija kłuby.
Eks-deputaty Kalakin, Trusaŭ i Labiedźka, fota z fejsbuka.
«Da 25-hodździa Kanstytucyi była sustreča byłych deputataŭ, my vyrašyli pasprabavać zarehistravać takoje hramadskaje abjadnańnie. Kab prajści hety šlach maksimalna chutka, my sustrelisia ź ministram justycyi Aleham Śližeŭskim. Jon paznajomiŭ z načalnicaj profilnaha adździeła, kab my mahli vypravić niejkija, na ich dumku, chiby ŭ statucie na etapie padrychtoŭki, a nie ŭ momant pryniacca rašeńnia», — skazaŭ nam Labiedźka.
Čym budzie zajmacca «Deputacki kłub»?
«Pieršaje — heta papularyzacyja idej parłamientaryzmu. U Biełarusi parłamientaryzmu niama, jość ruiny, jakija zastalisia z 12—13-ha sklikańnia. Budzie prapahandavać pryncypy padzieły ŭłady, svabodnyja i sumlennyja vybary, parłamientaryzm. Biez deputataŭ, jakich abirajuć ludzi, niemahčyma realizavać prahresiŭnyja reformy. My chacieli b stvarać takija ekśpiertnyja hrupy, vykarystoŭvać patencyjał ludziej, prapanoŭvać zakanadaŭčyja akty, prajekty zakonaŭ, jak ludzi z dośviedam sapraŭdnaj parłamienckaj raboty», — patłumačyŭ Labiedźka i adkazaŭ, ci voźmuć u taki kłub umoŭnaha atamana Ułachoviča.
«Heta buduć vyrašać deputaty, jakija źbiarucca na ŭstanoŭčy schod. Minimum udzielnikaŭ — heta deputaty 12—13-ha sklikańnia. Ale heta ž adkryta nie tolki dla tych, chto byŭ u apazicyi BNF u 12-m sklikańni, ci ŭ frakcyi «Hramadzianskaje dziejańnie», ci «Praca» u Viarchoŭnym Saviecie 13-ha sklikańnia. Buduć i tyja, chto byli va ŭładzie ci pry ŭładzie. Moža, buduć uklučać ludziej z sajuznaha parłamienta, ź miascovych savietaŭ, usio mahčyma», — skazaŭ jon.
