Kanstytucyjny sud (KS) vyvučaje mahčymyja napramki karekciroŭki norm Kanstytucyi, paviedamiła namieśnik staršyni KS Natalla Karpovič žurnalistam u paniadziełak u Minsku, paviedamlaje Interfax.by.
«Kanstytucyjnamu sudu byli dadzieny adpaviednyja daručeńni kiraŭnikom dziaržavy. My ŭvažliva vyvučajem mahčymyja napramki niejkich pieraŭtvareńniaŭ u hetaj častcy», — skazała Karpovič.
Pry hetym jana nahadała, što Kanstytucyja zamacoŭvaje asnovy kanstytucyjnaha ładu, pravavoje stanovišča asoby, sistemu dziaržaŭnaj ułady, asnoŭnyja paŭnamoctvy dziaržorhanaŭ i inšych orhanaŭ dziaržaŭnaj ułady, a taksama asnovy finansava-kredytnaj sistemy krainy.
«Adpaviednyja prapanovy va ŭstanoŭlenym paradku buduć uniesieny», — skazała Karpovič, adnak nie nazvała mahčymyja terminy ich padrychtoŭki.
Pry hetym jana zaŭvažyła, što Kanstytucyja praduhledžvaje dastatkova praciahły pieryjad jak hramadskich abmierkavańniaŭ, jakija tyčacca ŭniasieńnia źmianieńniaŭ u jaje, tak i prachodžańnia hetych źmienaŭ praz parłamient.
Alaksandr Łukašenka ŭ pačatku sakavika zajaviŭ pra nieabchodnaść uniasieńnia źmianieńniaŭ u Kanstytucyju krainy, u tym liku pa pytańniach abmiežavańnia prezidenckich paŭnamoctvaŭ i «tranzitu» ŭłady.
«Ja ŭpeŭnieny, što novuju Kanstytucyju nam pryjdziecca prymać. Treba budzie ŭzmacniać inšyja haliny ŭłady — vykanaŭčuju, zakanadaŭčuju. Moža być, paśla surjoznaha analizu, niešta treba budzie raspačać pa vybarčaj sistemie, uvodzić ci nie ŭvodzić praparcyjnuju sistemu abo spynicca na mažarytarnaj», — skazaŭ Łukašenka padčas «Vialikaj razmovy» z pradstaŭnikami hramadskaści i ŚMI.
Pry hetym jon adznačyŭ, što ŭ najbližejšyja dva hady źmieny Kanstytucyi čakać nie varta.
U toj ža čas, pavodle Łukašenki, prapanovy nakont źmienaŭ u Kanstytucyju jon ahučyć užo padčas pieradvybarnaj kampanii.
Kamientary