Vytvorčaść syru ź biełaj ćvillu, na jakuju patracili 4 młn jeŭra, u Lozna nie razharnułasia, a raniejšaja vytvorčaść syru «Sułuhuni» surjozna skaraciłasia, u vyniku ŭ pradpryjemstva zvaliłasia rentabielnaść.
U Loźnienskim vytvorčym cechu AAT «Małako» 12 sakavika prajšoŭ schod kalektyvu z udziełam hienieralnaha dyrektara hałoŭnaha pradpryjemstva Michaiła Pinčuka. Nahodaj dla jaho pasłužyła toje, što za 2018 hod i za studzień-luty 2019 cech syšoŭ u vialiki minus rentabielnaści, pieradaje hazieta «Ściah pieramohi».
Jašče ŭ 2017 hodzie rentabielnaść cecha składała amal 9 pracentaŭ. Za hod jon vypuściŭ bolš za 400 000 kiłahram syru, a pałovu vyrablenaha ŭ Lozna «Sułuhuni» pradavali ŭ Rasii.
U 2018 hodzie było vyrašana naładzić u Loźnie vytvorčaść syroŭ, jakija vyśpiavać pry ŭdziełu biełaj ćvili — typu kamambier. A vypusk «Sułuhuni» pieranieśli ŭ Šumilina, tudy ž advieźli i technałahičnuju liniju dla jaho vypusku. Na zakupku technałahičnaj linii dla vypusku syru ź ćvillu AAT «Małako» vydatkavała 4 młn jeŭra.
— Nam ž nichto nie daŭ dakładnaha receptu, tamu šukali infarmacyju ŭ internecie, ekśpierymientavali, sprabavali toje, što atrymałasia, i nie zaŭsiody radavalisia vyniku. Analizavali, što nie tak, i znoŭ pačynali z pačatku, — raspaviadaje pra ciažkaści pa vypusku loźnienskaha kamambieru dyrektar filijała Siarhiej Krasoŭski.
Zrešty, kali syr udałosia zrabić, paŭstała prablema z tym, kamu jaho pradavać: lijoźniency jeści syr ź pleśniaj admovilisia naadrez.
— Kab pryvučyć lijoźnincaŭ jeści syr ź ćvillu, patrebnyja nie miesiacy, jakija jon u nas rabiŭsia, a, napeŭna, hady. Toje ž samaje, biez sumnievu, možna skazać i pra bolšaść biełarusaŭ. Kab vyjści na rasijski rynak, bolš łajalny da padobnaha praduktu, taksama patrabujecca čas, — skardzicca spadar Krasoŭski.
Pa vynikach schodu vyrašyli ŭsio ž raźvivać vytvorčaść abodvuch praduktaŭ, ale asnoŭnym znoŭ stanie «Sułuhuni», «Kamambier» ža vystupić jak tavar druhoha płana i budzie pravodzicca ŭ asobnym pamiaškańni, jakoje jašče treba abstalavać.
Pradpryjemstvu pastaŭlena zadača znoŭ naładzić rynki zbytu sułuhuni i viarnuć raniejšyja abjomy. Častku rabotnikaŭ cecha adpravili ŭ čarhovyja adpačynki.
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža31
Kamientary