Viadomaha viciebskaha apazicyjnaha aktyvista Barysa Chamajdu milicyja zatrymała i skłała pratakoł administracyjnaha pravaparušeńnia, piša Radyjo Svaboda
25 sakavika Barys Chamajda vyjšaŭ u centr Viciebska z adzinočnym pikietam, ale jahonuju akcyju spyniła milicyja i skłała pratokoł za «zahruvaščvańnie vulicy» — pavodle art. 21.14 KaAP («parušeńnie paradku ŭtrymańnia nasielenych punktaŭ»).
Chamajda pryjšoŭ na miesca ŭ centry Viciebska, dzie štodnia raspaŭsiudžvaje niezaležnuju presu. Ale jaho ŭžo čakali milicyjanty ŭ cyvilnym. Chamajda admysłova rychtavaŭsia da Dnia Voli: uziaŭ z saboj ściah Viciebska ź bieł-čyrvona-biełaj stužkaj i nievialiki płakat. Na im — słovy rasijskaha piśmieńnika Ivana Bunina, jaki niekali naviedaŭ Viciebsk i zrabiŭ vysnovu: «Horod Vitiebsk drievnij i nierusskij».
Prastajać Chamajda paśpieŭ kala 10 chvilin. Milicyjanty ŭ cyvilnym vyklikali słužbovuju mašynu, na jakoj jaho zavieźli ŭ Čyhunačny RAUS Viciebska. Tam na aktyvista skłali pratakoł pra administracyjnaje parušeńnie, jaki budzie raźbirać administracyjnaja kamisija Čyhunačnaha rajona. Kali heta budzie dakładna, Barysu Chamajdu nie paviedamili.
Heta ŭžo druhoje zatrymańnie Chamajdy ciaham miesiaca za «zahruvaščvańnie vulicy». Na dumku Chamajdy, milicyja znarok paźbiahaje ŭžyvać suprać jaho «palityčny» artykuł za niesankcyjanavanaje pikietavańnie, kab nie pryciahvać uvahu hramadskaści.
