2 krasavika adbudziecca prezientacyja ŭnikalnaha dla Biełarusi spartyŭnaha prajektu — upieršyniu pačnie dziejnaść futbolnaja liha dla panienak, uzrost jakich nie pieravyšaje 13 hod.
Karaniami ideja zychodzić u 2017 hod, kali FIFA źviarnułasia da Fiederacyi futboła Biełarusi ź inicyjatyvaj ab akazańni dapamohi ŭ raźvićci žanočaha futboła ŭ krainie. Bo ŭ nas na toj čas isnavali tolki nacyjanalnaje i moładzievaje pieršynstvo. Spabornictvy ž dla maleńkich futbalistak pravodzilisia nierehularna i nie ŭ vialikaj kolkaści. Paśla dyskusij śpiecyjalisty pryjšli da idei stvareńnia respublikanskaha turnira pa futbole siarod dziaŭčatak u katehoryi U-13.
U debiutnym siezonie ŭ «Futbolnaj lizie dziaŭčat» zhulaje 60 kalektyvaŭ z usioj Biełarusi. Pryčym udzieł u spabornictvach voźmuć nie tolki kamandy ad DIUSŠ ci inšych śpiecyjalizavanych vučebna-spartyŭnych ustanoŭ, ale taksama pradstaŭnicy zvyčajnych ahulnaadukacyjnych škoł i fizkulturna-spartyŭnych kłubaŭ pry vykankamach.
Kamandy buduć padzielenyja na vosiem zon pa terytaryjalnym pryncypie. Pry padziele ŭličvalisia dva faktary: kab u kožnaj hrupie była pryblizna adnolkavaja kolkaść kalektyvaŭ i kab usie jany znachodzilisia na zručnaj adlehłaści adzin ad adnaho. Sistema nastupnaja: kamandy ŭ krasaviku-mai źjazdžajucca ŭ adno miesca i hulajuć miž saboj pa dvuchkołavaj sistemie. Pieramožcy vaśmi rehijanalnych zon vychodziać na respublikanski etap, i ŭ pačatku červienia ŭ Minsku pa alimpijskaj sistemie vyznačać najlepšuju kamandu krainy.
Pry dapamozie FIFA adbylisia admysłovyja trenierskija kursy dla śpiecyjalistaŭ, jakija pracujuć z udzielnicami novaj lihi — ciaham piaci dzion ekśpierty mižnarodnaj fiederacyi pavyšali kvalifikacyju trenieraŭ. Taksama ŭsie biez vyklučeńnia kamandy atrymali pa dvaccać miačoŭ i stolki ž kamplektaŭ hulniavoj formy «Adidas»: majka, šorty, hietry, bucy i ščytki.
Liha atrymaje chešteh #WOOOOW — słohan, jaki nie tolki tłumačyć matyvacyju dziejańniaŭ, ale i jadnaje ŭsie dyvizijony, adlustroŭvaje asnoŭnuju emocyju ad hulni. Akramia taho, za kožnaj terytaryjalnaj zonaj budzie zamacavany spartyŭny apiakun — futbalistka nacyjanalnaj zbornaj. Prafiesijnyja spartsmienki buduć padtrymlivać dziaŭčat, zapisvać videazvaroty i, hałoŭnaje, nahadvać im, što samaje pieršasnaje ŭ futbole — atrymańnie asałody.
«Futbolnaja liha dziaŭčat» atrymaje i miedyjapasłoŭ — žančyn z roznych halin dziejnaści, jakija damahlisia pośpiechaŭ u Biełarusi. U kožnaj z ambasadarak budzie svaja zona adkaznaści. Naprykład, Taćciana Łaviec, adna z najlepšych trenierak pa fizpadrychtoŭcy ŭ krainie, raspaviadzie dziaŭčatkam pra važnaść padrychtoŭki da hulniaŭ i navučyć pravilnaj raźmincy. Viadomaja biełaruskamoŭnaja žurnalistka Adarja Huštyn źviernie ŭvahu panienak na vielizarnaje značeńnie biełaruskaj movy, kultury i historyi.
Važna padkreślić, što liha budzie adukacyjna-aryjentavanaj. Kožny dyvizijon budzie nazvany ŭ honar vybitnaj biełaruski: Uršuli Radzivił, Sałamiei Pilštynovaj, i hetak dalej. «Imkniomsia padkreślić, što biełaruski futboł — pavaha da biełaruskaj historyi, kultury, tradycyj i dośviedu. Kožny dyvizijon nazvany ŭ honar viadomaj biełaruski, kab u pracesie futbolnych spabornictvaŭ my mahli raspaviadać pra historyju rehijona, krainy, a taksama pra toje, što važna bieražliva stavicca da tych nabytkaŭ i histaryčnaha skarbu, jakim vałodaje Biełaruś», — adznačaje Jury Sadoŭski, kiraŭnik departamienta markietynhu i kamunikacyj ABFF.
Nahadajem, što prezientacyja prajekta adbudziecca 2 krasavika a 14 hadzinie na terytoryi kulturnaj prastory «OK16» (Minsk, vulica Kastryčnickaja, 16).
«Moj kachany nie čytaje naviny, kali jany napisanyja pa-biełarusku». Darja Caryk stała na abaronu ruskaj movy i pryplała navat Paźniaka48
Kamientary