Barysaŭskija krajaznaŭcy źviarnuli ŭvahi, što adrazu niekalki vulic u paŭnočnaj častcy horada atrymali nazvy ŭ honar rasijskich impierataraŭ.
Raniej hetyja vulicy nijak nie nazyvalisia. Dadzienaja terytoryja ctała zabudoŭvacca adnosna niadaŭna, u narodzie hetaje miesca nazyvałasia «Aeradrom». Damy ŭščylnuju padychodziać da viosak Stara-Barysaŭ i Dziamidaŭka (radzima pamierłaha kiraŭnika BATE Anatola Kapskaha).
Jak paviedamlaje hazieta «Homan Barysaŭščyny», žychar horada Michaił Saŭko źviarnuŭsia ŭ rajvykankam, kab jamu patłumačyli, adkul u Barysavie źjavilisia vulicy Alaksandraŭskaja, Paŭłaŭskaja i Ramanaŭskaja.
Spadaru Saŭko pryjšoŭ adkaz za podpisam namieśnicy staršyni rajvykankama Lijany Chmurovič, jakaja adpisała, što heta «viartańnie da tradycyj, u pačatku XX stahodździa vulicy horada nazyvalisia ŭ honar impieratarskich asobaŭ».
Sama Lijana Chmurovič u kamientary «Našaj Nivie» adkazała, što adkazvaje ŭ rajvykankamie za ekanamičnuju śfieru, a hety list padpisvała, kali ŭ adpačynku znachodziłasia inšaja namieśnica kiraŭnika rajona Anastasija Kopikava, jakaja adkazvaje za sacyjalnuju śfieru.
Anastasija Kopikava admoviłasia kamientavać, čamu vulicam Barysava nadadzienyja imiony rasijskich caroŭ i chto inicyjavaŭ taki praces.
U pieryjad, kali Biełaruś uvachodziła ŭ skład Rasijskaj Impieryi, u Barysavie, sapraŭdy, isnavali «Alaksandraŭskaja» i «Paŭłaŭskaja» vulicy. Ale znachodzilisia jany zusim u inšych miescach.