U piatnicu Łukašenka pravioŭ pierastanoŭki ŭ Administracyi prezidenta. Pieršym namieśnikam Uładzimira Makieja stała Natalla Piatkievič. Jana zamianiła na hetaj pasadzie adyjoznaha Anatola Rubinava, čałavieka stalinskich pohladaŭ.
Natallu Piatkievič adnosiać da łahieru libierałaŭ u atačeńni Łukašenki. Časta mienavita hetaja «žaleznaja łedzi» biełaruskaj palityki ahučvaje najbolš niepapularnyja kroki ŭładaŭ. Tak było ź ilhotami, kali spn.Piatkievič prapanoŭvała skasavać ich całkam, z amnistyjaj.
Razam z tym, jana nie pahadžałasia z reformaj adukacyi, kali ź ironijaj skazała, što moža varta admianić i anhielskuju movu dla vykładańnia ŭ škołach i VNU, kab vypuskniki nie vyjazdžali za miažu.
U 2007 hodzie jana mieła pieramovy ŭ Minsku z namieśnikam pamočnika Dziaržsakratara ZŠA Devidam Kremieram. Taja sustreča skončyłasia vyzvaleńniem troch palitviaźniaŭ.
Za apošni hod kudy tolki nie ssyłali Piatkievič. Chadzili čutki pra jaje pryznačeńnie staršyniom Kanstytucyjnaha sudu ci kiraŭnicaj Biełteleradyjokampanii. Na spravie ž akazałasia, što pajšła na pavyšeńnie na staroj pracy.
Namieśnikam kiraŭnika Administracyi prezidenta pryznačany Mikałaj Snapkoŭ, jaki dahetul zajmaŭ pasadu namieśnika staršyni Mahiloŭskaha abłvykankamu.
* * *
Natalla Piatkievič naradziłasia ŭ 1972 u Minsku. Skončyła jurfak BDU (1994). U 2001 hodzie była pryznačanaja pres‑sakratarom Łukašenki. Z 2004 hodu — namieśnica kiraŭnika Administracyi prezidenta. U 2006 hodzie joj byŭ zabaronieny vyjezd u krainy Jeŭrasajuzu i ZŠA, sioleta sankcyi byli admienienyja. Kandydat jurydyčnych navuk.
