Baraŭlanskim adździełam Minskaha RUUS spynieny kryminalny pieraśled dvuch maładych ludziej, zatrymanych u Kurapatach viečaram 1 listapada 2008 hoda i padazronych u źniščeńni pamiatnych kryžoŭ.Pra heta paviedamiła BiełaPAN śledčy Baraŭlanskaha adździeła Minskaha RUUS Alena Chilčuk.
U intervju BiełaPAN načalnik śledstva Baraŭlanskaha adździeła Ihar Baradač zaznačyŭ, što dokazaŭ, atrymanych padčas rasśledavańnia, niedastatkova dla pieradačy spravy ŭ sud i pryciahnieńnia da kryminalnaj adkaznaści dvuch niepaŭnaletnich minčan — navučencaŭ škoły i praftechvučylišča.
Razam z tym, paviedamiŭ I.Baradač, praciahvajecca rasśledavańnie kryminalnaj spravy pa fakcie źniščeńnia pamiatnych kryžoŭ u Kurapatach. Pavodle jaho słoŭ, buduć prymacca miery pa ŭstanaŭleńni asob, jakija ŭčynili hetaje złačynstva.
***
11 listapada 2008 hoda Baraŭlanskim adździełam była raspačata kryminalnaja sprava na padstavie artykuła 346, častka 2 Kryminalnaha kodeksa (ździek nad historyka‑kulturnymi kaštoŭnaściami), jaki praduhledžvaje pakarańnie ŭ vyhladzie štrafu, abo aryštu na termin da šaści miesiacaŭ, abo abmiežavańnia voli na termin da troch hadoŭ, abo pazbaŭleńnia voli na toj ža termin.
1 listapada pryblizna ŭ 22.00 demakratyčnyja aktyvisty ź Minska Alaksandr Makaŭ i Aleh Śvirydaŭ zatrymali ŭ Kurapatach dvuch maładych ludziej. Jany byli ŭ niećviarozym stanie i łamali pamiatnyja kryžy na alei, što viadzie ad Kryža pakutaŭ da ŭzhorka ź miemaryjalnym kamieniem achviaram stalinizmu. Adzin z zatrymanych pa mabilnym telefonie vyklikaŭ na miesca zdareńnia baćkoŭ i zajaviŭ, što chutka pryjedzie jaho baćka, pakaža svaju «koračku» (paśviedčańnie asoby) i vyzvalić junakoŭ. Praź niekalki chvilin paśla telefonnaha vykliku pryjechali baćki maładoha čałavieka, adnak baćka, nasupierak abiacańniam zatrymanaha, ničoha nie skazaŭ A.Makavu i A.Śvirydavu ni va ŭročyščy, ni ŭ Baraŭlanskim adździele Minskaha RUUS, kudy ich dastavili razam z zatrymanymi.
Za apošnija try hady pa faktach vandalizmu ŭ Kurapatach, z 1993 hoda ŭniesienych u Dziaržaŭny śpis historyka‑kulturnych kaštoŭnaściej Respubliki Biełaruś jak pomnik historyi mižnarodnaha značeńnia «Miesca źniščeńnia achviaraŭ palityčnych represij 1930—1940‑ch hadoŭ va ŭročyščy Kurapaty», treci raz raspačynajecca kryminalnaja sprava. Upieršyniu spravu adkryŭ Minski RUUS u śniežni 2005 hoda na padstavie artykuła 341 KK (apahanieńnie zbudavańniaŭ i psavańnie majomaści), druhi raz — u sakaviku 2008 hoda na padstavie artykuła 339, častka 1 KK (chulihanstva). Adnak u abodvuch vypadkach złačyncy nie byli ŭstanoŭleny i pakarany. Takim čynam, vandałaŭ udałosia zatrymać upieršyniu, pryčym pradstaŭnikam hramadskaści.
