Miedyčnaja kamisija 12 studzienia pryniała rašeńnie, što Ivan Šyła z Salihorsku prydatny dla prachodžańnia vajskovaj słužby.Šyła nabyŭ viadomaść jak adzin ź lideraŭ Maładoha Frontu. Jaho sudzili, aryštoŭvali, a kali pabačyli, što štrafami nie zapałochać, vyhnali z škoły ŭ čas vypusknych ekzamienaŭ u červieni 2008 hodu.
«Ja da apošniaha nie chacieŭ afišavać spravu z maim pryzyvam, bo sumniavaŭsia, ci jość tut palityčny čyńnik. Ciapier zbolšaha sumnievy raźviejalisia. U paniadziełak, kali vychodziŭ z padjezdu, kab pajści ŭ vajenkamat, mianie adrazu zatrymali supracoŭniki milicyi, i sami advieźli tudy. Doŭhi čas kančatkovaje rašeńnie ab tym, ci pajdu ja ŭ vojska, tarmaziłasia rašeńniem psichołaha. Razumiejecie, tam u vajenkamacie siadzić maładzieńkaja dziaŭčyna, jakaja hlanuła na maju bijahrafiju, dzie jość kryminalnaja sudzimaść, zvyš vaśmidziesiaci zatrymańniaŭ i niekalki miljonaŭ štrafu, ščyra zapytałasia: a takich biaruć u vojska?» — kaža Ivan Šyła.
Adrazu pa pryvozie Šyły ŭ vajenkamacie prajšła kamisija, dzie prysutničali hałoŭny doktar salihorskaj rajonnaj balnicy, lekar ź Minsku, a taksama dva pradstaŭniki miascovaha vajenkamatu. Pavodle Ivana, na pasiadžeńni prysutničaŭ supracoŭnik KDB, jaki kuryruje salihorskuju apazicyju. Mienavita jon davaŭ niejkija parady vajenkamu.Taksama prysutničała zdymačnaja hrupa BT.
U vyniku kamisija pryniała rašeńnie, što Šyła moža prachodzić terminovuju słužbu ŭ vojsku. Nijakich pieraškod pa zdaroŭju ŭ jaho niama. Ciapier 15 studzienia chłopiec musić źjavicca na pryzyŭnuju kamisiju, dzie buduć prysutničać pradstaŭniki vajskovych čaściej. Najchutčej, što tady i stanie viadoma, dzie budzie słužyć adzin ź lideraŭ «Maładoha frontu». Ivan prahnazuje, što jaho pavinny zabrać u boty da 18 studzienia.
«Zabirajučy u vojska, mianie pazbaŭlajuć mahčymaść atrymać dypłom ab siaredniaj adukacyi nie na paŭtara hodu, a na dva z pałovaj. A dla mianie zaraz hałoŭnaje akurat atrymańnie adukacyi», — trochi škaduje I.Šyła. Praź nieatrymańnie dypłomu chłopiec nie zmoh pastupić na vučobu ŭ VNU.
Ale słužyć pojdzie:
«Zakon jość zakon ja nie chaču jaho parušać i asprečvać, ale b ja chacieŭ, kab jon byŭ roŭny dla ŭsich».
