U Minsku adbyŭsia piaty fiestyval kraftavaha piva.
Što takoje kraftavaje piva? Heta piva vypuščanaje nievialikimi pryvatnymi brovarami. U pierakładzie słova «kraft» značyć samarobny.
Kraft pakazvaje, što piva moža być vielmi roznym, a nie standartnym mahazinnym łahieram. Jano moža być horkim i pachnuć ekzatyčnymi fruktami (i heta budzie nie chimija, a efiekt chmielu), ekstremalna mocnym, ale pry hetym nijakaha śpirtu ŭ smaku vy nie adčujecie, moža być kisłym i nie być pry hetym sapsavanym, piva moža być vendžanym i navat salonym. Jano moža być lubym, adzinaje abmiežavańnie — heta vaša fantazija.
Naprykład, adnym z samych papularnych hatunkaŭ na feście byŭ hoze «Čełada». Heta tradycyjny niamiecki kisła-salony hatunak z horada Lejpcyha. Z prychodam kraftavaj revalucyi hoze atrymała novaje žyćcio. I ciapier ź jakimi dadatkami jaho tolki nie varać. Voś «Čeładu» pryhatavali sa śviežymi pamidorami i tryma vidami piercu. Mabyć, niepadrychtavany čałaviek uvohule b nie paznaŭ u hetym napoi piva.
Samym papularnym na feście akazaŭsia impierski staŭt «Bunin», jaki pryviez varoniežski brovar Brewlok. Chłopcy ŭ rasijskaj pravincyi robiać absalutna fantastyčnaje piva. «Bunin» — heta amal 14-hradusny staŭt, jaki byŭ vytramany na treskach kaŭkazskaha duba.
Ź biełarusaŭ, jak zaŭsiody, u topie byli Midnight Project. Nie tak daŭno hety brovar byŭ u top-50 najlepšych u śviecie pa adznakach karystalnikaŭ piŭnoj sacyjalnaj sietki Untappd. Heta im dazvoliła zvaryć piva sumiesna z adnym samych krutych u śviecie brovaraŭ — dackim Mikkeler. Zasnavalniki «Mikielera» navat pryjazdžali dla hetaha ŭ Biełaruś.
Čarha da «Midnajtaŭ» była samaja doŭhaja, kab pakaštavać ich parečkavy kiślak, miłšejk z marakujaj i sezan z hurkami.
Fest prachodziŭ na placoŭcy OK16 na vulicy Kastryčnickaj. Heta byłyja pamiaškańni savieckich zavodaŭ, jakija siońnia asvojvajuć minskija chipstary. Tyja jašče ŭražańni, kali ŭ byłych zavadskich cechach soŭhajucca tudy-siudy baradačy z novym ekstremalnym hatunkam.
Na feście było bolš za paŭsotni brovaraŭ. Pryjechali pivavary navat sa Šviecyi i Vialikabrytanii. U ZŠA rynak kraftavaha piva składaje ŭžo 13% ad ahulnaha abjoma. Biełarusam i praz tradycyju, i praź finansavaje stanovišča pra takija ličby pakul rana maryć. Ale fakt, što ŭ nas vyrablajecca šmat niezvyčajnaha i jakasnaha piva.
Kamientary