Biez sumnievaŭ, u kožnaj siamji jość svaje firmovyja recepty na Vialikdzień — asablivyja kuličy i paschi, stravy na vielikodny śniadanak, kiłbaski i piačysta. U našaj siamji zaŭsiody rabili šmat kuličoŭ — z razynkami, cukatami ci limonnaj cedraj. Ale tvarožnyja paschi ŭvieś čas niejak ihnaravalisia. I ŭ hetym hodzie ja pasprabavała ŭvieści jaje na naš stoł, bo jak možna nie pakaštavać spałučeńnie chatniaha najsmačniejšaha tvarahu z sałodkimi i nasyčanymi cukatami. Pakaštujcie i vy!
Nam spatrebicca:
- 500 hr. tłustaha tvarahu;
- 100 hr. masła;
- 100 hr. razynak;
- 100 hr. cukataŭ z apielsinavaj skurki;
- 80 hr. funduku;
- 70 hr. horkaha šakaładu;
- 50 hr. cukataŭ ź višni;
- 200 hr. cukrovaj pudry;
- 4 varanyja žaŭtki;
- vanilnaja esiencyja na smak;
- 4 st. ł. romu ci kańjaku.
Tvaroh adciskajem ad zališniaj vilhaci z dapamohaj marli. Masła dastajom z chaładzilnika, kab jano stała miakkim.
Tym časam rychtujem sałodkija dadatki da našaj paschi. Razynki zalivajem kipieniem, pakidajem na chvilin 10, potym źlivajem vadu i sušym. Cukaty i arechi narazajem drobnymi kavałkami. Šakaład trom na tarcy. Varanyja žaŭtki pieracirajem praź sita ci videlcam.
Masła dobra źmiešvajem z cukram i dadajom da tvarahu. Dałučajem da tvarožnaj masy arechi, cukaty, razynki, šakaład i žaŭtki. Dobra źmiešvajem. Apošnimi dadajom vanilnuju esiencyju i kańjak ci rom.
Formu dla paschi vyściłajem marlaj i vykładajem u jaje tvarožnuju masu. Pryciskajem źvierchu hruzam i pakidajem u chaładzilniku minimum na 12 hadzin, a lepiej na ŭsie 24. Kali vašaja forma biez dna, to pastaŭcie jaje na taleračku, kab było kudy źbiracca syrovatcy.
Smačna jeści!
Kamientary