22 krasavika kala adnaho z damoŭ u Połacku znajšli cieła 26-hadovaha Ramana Cyro. Jaho mocna źbili, a paśla zakapali pad domam.
Ciapier usie troje padazravanych pad vartaj. Dvaim ź ich niama jašče i 18 hadoŭ, ich zatrymali ŭ Połacku. Treci, starejšy chłopiec, paśpieŭ źbiehčy ŭ Rasiju, ale tam jaho zatrymali.
Čytajcie: Zakapali žyŭcom, bo kachaŭ školnicu? Padrabiaznaści trahiedyi ŭ Połacku, dzie padletki zabili mužčynu
Ciapier małodšyja chłopcy vinavaciać svajho starejšaha siabra. Ale niezrazumieła, što šturchnuła maładzionaŭ na taki strašny krok. Mama zahinułaha zapeŭnivaje, što kanflikt byŭ praz 16-hadovuju školnicu, ź jakoj sustrakaŭsia Raman: nibyta padazravanyja patrabavali ad chłopca napisać raśpisku, što jon admaŭlajecca ad dziaŭčyny. Ale ž sama školnica kaža, što i z Ramanam jana prosta siabravała, a nie sustrakałasia, dyj nichto z troicy padazravanych da jaje nie zalacaŭsia.
«Naša Niva» źviazałasia sa svajakami i znajomymi chłopcaŭ. Usie vinavaciać, chutčej, ład žyćcia chłopcaŭ, ałkahol ci narkotyki. Nu i taksama taho starejšaha siabra.
Słava, 16 hadoŭ, vučyŭsia ŭ palitechničnym kaledžy
«Słava — cichi chłopiec, jaki nikoli nie lez ŭ prablemy. Jon navat nie vyhladaje na svaje 16 hadoŭ. Što jon tam rabiŭ, kali zabivali taho Ramana, ja ŭjavić nie mahu, — raskazvaje siabar chłopca. — Miarkuju, što Słava prosta vypadkova akazaŭsia ŭ toj situacyi. Jon achviara abstavinaŭ. Pra toje, kab u Słavy byli prablemy z ałkaholem, ja nie viedaju.
Ale heta ž zakon rajona: tvoj tavaryš pje — i ty musiš pić, tvoj tavaryš bje — i ty musiš bić. Tamu jany ciapier i adpraviacca tudy, kudy adpraviacca, jašče i čałavieka zahubili».
Juryj, 17 hadoŭ, vučyŭsia na plitačnika
Druhi niepaŭnaletni fihurant spravy — Juryj. Jamu 17 hadoŭ.
Jura z šmatdzietnaj siamji. Ale ciapier maci žyvie z ajčymam chłopca. Aboje stała nidzie nie pracujuć, kažuć ich znajomyja. Ajčym časam biare šabaški, plus atrymlivajuć dapamohu na dziaciej. Prablemy z ałkaholem u siamji taksama jość. Mama ciapier nie pje, bo peŭny čas tamu zakadziravałasia, a voś ajčym vypivaje.
Chłopiec vučyŭsia ŭ prafiesijnym licei budaŭnikoŭ. Śpiecyjalnaść — plitačnik. Ale jašče za paru miesiacaŭ da trahiedyi jaho adličyli — nie zdaŭ ekzamieny.
«Vučyŭsia jon siarednie: i nie dobra, i nie kiepska. Bojki časam byli: nie skazać, što lubiŭ bicca, ale moh paŭdzielničać», — kaža były adnahrupnik Jury.
Inšy chłopiec, jaki ros razam ź Juram i Słavam, vinavacić u zdareńni ład žyćcia chłopcaŭ. I starejšaha chłopca — 20-hadovaha Vadzima, treciaha padazravanaha, jaki paśla zabojstva źbieh u Rasiju:
«Hałoŭnaja prablema ŭ tym, što jany vielmi rana pačali pić i hulać. U Jury ź dziacinstva byli prablemy: jon vypivaŭ, taksikamaniŭ.
Plus prykład Vadzima — jamu 20 hadoŭ, i dla małodšych jon byŭ vuličnym aŭtarytetam».
Vadzim, 20 hadoŭ, vučyŭsia na kuchara
«Sam jon nieŭraŭnavažany, miahka kažučy. Ja na 99% upeŭnieny, što ŭsio tam adbyłosia praz taho Vadzima, — kaža surazmoŭca «Našaj Nivy». —
Vadzim nikoli nidzie nie pracavaŭ. Prajšoŭ niejkija kursy kuchara, ale na pracu tak i nie chadziŭ.
Jon moh vypić i pačać kazać: usio, chaču pabicca z kimśćci.
Niejak my sustreli ŭviečary pjanaha Vadzima, paraili jamu iści dadomu, bo milicyja zabiare. U adkaz jon pačaŭ kryčać: jakaja milicyja, mnie pofihu. I heta byŭ pieršy vypadak, kab nie milicyja pryčapiłasia da minaka, a jon da milicyi: Vadzim pabieh za patrulnaj mašynaj z krykami. A kali jana spyniłasia, jon palez u bojku ź milicyjantami. Jaho zabrali, kaniečnie, ale, zdajecca, nie asudzili, dali štraf.
Vadzim pastajanna havaryŭ na niejkija turemnyja temy, pakazvaŭ parezanyja ruki, raskazvaŭ, što heta jon ad naža adbivaŭsia…
I ŭsie jany pili tam, dzie možna było vypić. Dy i Hramy — sam rajon taki, tam heta masavaja źjava».
Praŭda, Uładzimir, rodny brat Vadzima, abaraniaje svajho svajaka. Jon miarkuje, što vinavatyja narkotyki.
«Ja nie vyklučaju, što toj, kaho prykapali, i sam moh na ich kinucca. Jon byŭ taki rezki chłopiec. A Vadzim spraviadlivy, jon zaŭsiody abaraniaŭ svaich i siabroŭ i znajomych. Moh prosta za małodšych zastupicca, — kaža Uładzimir. — Akramia taho, paśla zabojstva toj Jura kazaŭ adnamu z malcaŭ na rajonie, što jany štości pakuryli ŭ toj viečar».
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym5
Kamientary