13 krasavika va Uruččy, pad voknami kazarmy 120-j miechanizavanaj bryhady, znajšli 21-hadovaha sałdata Andreja Makajeda. Chłopiec słužyŭ niadoŭha, ź listapada.
Pa aficyjnaj viersii, sałdat vykinuŭsia z čaćviortaha paviercha — vyskačyŭ z vakna prybiralni, bo nie vytrymaŭ ździekaŭ. Paśla miedycynskaj komy i niekalkich apieracyj Andrej pryjšoŭ u prytomnaść.
Paśla zdareńnia zaviali kryminalnuju spravu za daviadzieńnie da samahubstva. Padazravany — major Vital Č., jaki prynižaŭ Andreja i inšych sałdat.
Ciapier stan Andreja aceńvajecca jak siarednieciažki. Chłopcu zrabili apieracyju i vydalili častku padstraŭnikavaj załozy i całkam sielazionku. Akramia taho, praz peŭny čas jaho čakaje jašče i apieracyja na ściahnie.
Krynicy raskazvajuć, što major Vital Č. pastajanna ździekavaŭsia z sałdat i abražaŭ ich.
«Sałdaty raskazvali, što Č. kazaŭ: žyvioły, ja vam žyćcia nie dam. I heta jašče miakka. Dla majora było normaj nazyvać sałdat «končanymi bł***», «stvareńniami», pytacca, navošta ich mama naradziła. Jon pastajanna kazaŭ: «Vy ŭ mianie pazdychajecie tut», — raspavioŭ surazmoŭca «Našaj Nivy». — Taksama major prymušaŭ sałdat addavać čeść sa słovami «Ja zał**a» [hałoŭka pałavoha člena].
Pra toje, ci biŭ major sałdat, źviestak pakul niama. Ale kažuć, što adnojčy Č. prymusiŭ Andreja apranuć zimovuju vopratku, broniekamizelku dy kasku i ŭ takim vyhladzie 6 hadzin stajać pad dźviaryma svajho kabinieta. Kali major narešcie adpuściŭ chłopca, u taho ŭsia vopratka była mokraja naskroź.
Padziei taho dnia, kali Andrej vypaŭ z vakna, viadomyja častkova. Andrej byŭ u štabie razam ź inšymi sałdatami. U chłopca i jaho sasłužyŭca byli padpisanyja papiery na karotkaje zvalnieńnie. Ale ŭ štab zajšoŭ Č., pačaŭ abražać sałdat, kryčać, što jany štości tam nie prybrali, i nazyvać «žyviołami». Major zabraŭ u sałdat papiery na zvalnieńni i parvaŭ ich.
Paśla major nibyta jašče niekalki razoŭ viartaŭsia, abražaŭ i kryčaŭ na sałdat.
Zatym z Andrejem zdaryłasia biada.
Viadoma, što sam chłopiec nie pamiataje padrabiaznaści taho, jak vypaŭ z akna. Ale jaho baćki sumniajucca, što chłopiec pajšoŭ na samahubstva. Kažuć, što Andrej zaŭsiody byŭ vielmi razvažlivym i adekvatnym čałaviekam.
Da taho ž i jon, i ŭsia jaho siamja — ščyryja chryścijanskija vierniki, tamu baćki nie vierać, što chłopiec moh rašycca na taki radykalny krok.
«Andrej z dobraj i zabiaśpiečanaj siamji. Jon vydatna vučyŭsia, baćki zaŭsiody jaho padtrymlivali. I baćki nie daduć zrabić ź jaho varjata, jaki vyskačyŭ z vakna», — kažuć znajomyja siamji Andreja.
Cikava, što z sajta Minabarony ŭžo prybrali navat adziny karotki artykuł, u jakim uzhadvajecca major Č.
Sam Vital Č. admoviŭsia ad kamientaraŭ, paviedamiŭ, što razmovu spačatku treba ŭzhadnić z namieśnikam pa ideałohii bryhady. Pakul što major nie pad vartaj.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym5
Kamientary