Hrodzieniec Andrej Hałavienka raspavioŭ Hrodna.life, što jašče ŭ pačatku maja kryminalnuju spravu zakryli, a zamiest jaje pačali administracyjnuju. U vyniku za riepost klipa Rammstein jon atrymaŭ štraf — 1275 rubloŭ (50 bazavych vieličyniaŭ).
Čytajcie taksama: U Hrodnie raspačali kryminalnuju spravu za repost klipa Rammstein
Klip Pussy niamieckaha hurta Rammstein Andrej raźmiaściŭ na svajoj staroncy ŭ vieraśni 2014 hoda. Praz 4,5 hady, 21 maja 2019-ha, adździeł kulturałahičnych ekśpiertyz Dziaržkamiteta sudovych ekśpiertyz pryznaŭ klip zabaronienym da raspaŭsiudžvańnia z-za ŭtrymańnia parnahrafičnych scen.
Na padstavie ekśpiertyzy Śledčy kamitet pačaŭ kryminalnuju spravu pa č.2 st.343 KK (vyrab i raspaŭsiud parnahrafii). Za heta pahražaje ad 2 da 4 hadoŭ pazbaŭleńnia voli.
«Z-za terminu daŭniny spravu pieraviali ŭ administracyjnuju. Taksama moj pracadaŭca daŭ stanoŭčuju charaktarystyku ź miesca pracy, — raspaviadaje Andrej. — U vyniku 10 maja mnie ahučyli prysud: abyšłosia štrafam u pamiery 50 bazavych. Pryjšłosia jašče zapłacić za vydatki suda i za praviedzienuju ekśpiertyzu. Dobra, što ŭsio tak skončyłasia».
Usie sabranyja hrošy pajšli na advakata i štraf
Kali infarmacyja pra kryminalnuju spravu stała publičnaj, Andreja padtrymali mnohija biełarusy. Chłopiec prasiŭ dapamahčy sabrać hrošy na advakata.
«Vialiki dziakuj usim tym, chto mnie dapamoh. Ja nie dumaŭ, što ludzi adhuknucca i padtrymajuć mianie ŭ ciažkuju chvilinu. Heta vielmi pryjemna, što ŭ nas jość takija ludzi. Navat pradstaŭniki hrupy Rammstein vychodzili na mianie i hatovyja byli dapamahčy, ale na toj momant dapamoha ŭžo nie była patrebnaja. Usie sabranyja srodki pajšli na advakata i na pahašeńnie štrafu. Raju ŭsim na budučyniu hladzieć, što dadavać u sacyjalnyja sietki. Za ŭsimi nami sočać», — skazaŭ Andrej.