Pa technałohii Clevetura sensary ŭbudavanyja ŭ knopki. Heta kardynalna adroźnivajecca ad pryncypu raboty noŭtbukaŭ albo kłavijatury z vyniesienaj sensarnaj panellu. Kłavišy reahujuć na dotyki i žesty, jak tačpad abo myš. Nie źmianiajučy stanovišča ruk, možna nadrukavać tekst, prakrucić staronku abo pasunuć kursor.
Što važna, pierachod pamiž režymami aŭtamatyčny. Ubudavany mikrakantroler imhnienna raspaznaje i apracoŭvaje kožny dotyk i nacisk. Sistema vyznačaje charaktar dziejańniaŭ, a karystalnik moža nie zadumvacca, u jakim režymie pracuje. U hetym i zaklučajecca ŭnikalnaść sistemy, jakaja zabiaśpiečvaje intuityŭnaje ŭzajemadziejańnie z pryładaj i novy karystalnicki dośvied.
Technałohija daje mahčymaść apracoŭki mnostva adnačasovych naciskaŭ, dotykaŭ i žestaŭ. Tym samym možna vykarystoŭvać usie zvykłyja sposaby ŭzajemadziejańnia: zum, pierachod pamiž pracoŭnymi stałami zmachvańniem i skroł dotykam dvuch palcaŭ.
Sistema dazvalaje pracavać chutčej, asabliva kali patrabujecca adnačasova vykarystoŭvać kłavijaturu i myš. Prostaja situacyja: pakul karystalnik piša važny list, jamu telefanujuć pa Skype. Kab skinuć zvanok myššu ci tačpadam, treba pieranieści ruku, pierasunuć kursor, nacisnuć knopku admieny vykliku, vybrać akno paviedamleńnia i h.d. Z Clevetura možna adchilić niepatrebny dyjałoh adnym žestam. Taki sposab uzajemadziejańnia nazyvajecca biasšoŭnym, pakolki dazvalaje nie zadumvacca ab pryładzie ŭvodu.
Pravy na technałohiju naležać Clevetura. Biełaruski startap apošnija hady pracuje jak rezident Parku vysokich technałohij. Inviestaram vystupiŭ Siarhiej Kaścievič, zasnavalnik chołdynhu ASBIS i brenda Prestigio. Ad idei da kamiercyjnaha pratatypa prajšło kala troch hadoŭ. Raspracoŭščyki čakajuć atrymańnia patenta.
Vytvorčaść pryład pa technałohii Clevetura pačniecca ŭ lipieni hetaha hoda. U prodažy kłavijatura Click&Touch pad brendam Prestigio źjavicca pry kancy žniŭnia. U płanach na hety hod — vypusk kala 100 tysiač hadžetaŭ.
Da kłavijatury možna adnačasova padklučyć da piaci pryład: pa troch Bluetooth-kanałach, z dapamohaj USB-pryjomnika i kabiela Type-C. Jana taksama dazvalaje źmianić hučnaść abo pieramatać videa, kali pravieści naleva i naprava pa pavierchni kłaviš vierchniaha šerahu. Dla naładki i abnaŭleńnia praduhledžany mabilny dadatak. Korpus u kłavijatury lohki i erhanamičny — z admysłovymi pahłybleńniami dla ruk.
