Mahutny vybuch prahrymieŭ u centry Kijeva nočču ŭ niadzielu, 16 červienia. Jon adbyŭsia ŭ troch haražach, jakija znachodzilisia ŭ dvary pobač z žyłymi damami. Pra heta paviedamlaje TSN.
Jak raspaviali miascovyja žychary, haražy arandavali ŭładalniki kavavych mašyn, jakija zachoŭvali ŭ pamiaškańniach nie tolki aŭtamabili, ale i bałony z hazam.
Pavodle papiarednich źviestak, pryčynaj moh być haz, uciečka jakoha adbyłasia praz paškodžańnie truby.
Paśla vybuchu miascovyja žychary vyjšli na vulicu, niekatoryja z saboj zabrali chatnich žyvioł. Adnoj pažyłoj žančynie vyjści z domu dapamahali supracoŭniki MNS i palicejskija.
Vybuch adbyŭsia na skryžavańni vulic Bulvarnaj-Kudraŭskaj i Turhienieŭskaj. «Viadoma, što vybucham raźviarnuła toŭstyja bietonnyja plity taŭščynioj bolš za 20 sm. A vobłaka pyłu ŭźniałosia na vyšyniu amal 100 m», — havorycca ŭ paviedamleńni na dtp.kiev.ua. U susiednich damach vybiła ŭsie vokny.
Na miescy pracujuć dziasiatki ratavalnikaŭ, jakija raźbirajuć zavały. Pavodle papiarednich źviestak, nichto ź ludziej nie paciarpieŭ.
