Z pačatku bajavych dziejańniaŭ na ŭschodzie Ukrainy kapitan Dryšluk uvajšoŭ u skład ekipaža samalota AN-30 jak bartavy technik. 22 krasavika 2014 ha samalot trapiŭ pad abstreł nad Słavianskam [horad abłasnoha značeńnia ŭ Danieckaj vobłaści], ale nie atrymaŭ surjoznych paškodžańniaŭ i pryziamliŭsia ŭ Baryspali.
6 červienia ekipaž Dryšluka znoŭ trapiŭ pad abstreł z PZRK. Samalot straciŭ vyšyniu i pačaŭ padać nad žyłymi rajonami. Kamandzir ekipaža Kanstancin Mahiłka addaŭ zahad usim, akramia ekipaža, pakinuć bort. Sam razam z Dryšlukom i druhim bortmiechanikam Alaksiejem Patapienka zastaŭsia — treba było advieści pahrozu ad ludziej unizie.
Amal adrazu ž zahinuŭ apieratar fotazdymki Siarhiej Kaminski — kamandzir zahadaŭ skinuć jaho cieła na parašucie. Jašče traich čałaviek vyratavaŭ Dryšluk — jon dapamahaŭ zdymać broniekamizelki i nadzieć parašuty. Skakać davodziłasia z 800-mietrovaj vyšyni. Chutkaść padzieńnia była vielizarnaj — ludziej davodziłasia litaralna adryvać i adšturchoŭvać z samalota.
U płanach tych, chto zastalisia na borcie, było pasadzić sudna na biaśpiečnaj terytoryi — dzie nie było ludziej. Ale za niekalki dziasiatkaŭ mietraŭ da ziamli advaliłasia kryło — vyratavacca nie ŭdałosia nikomu. Samalot byŭ całkam razburany.
Cieły zahinułych było składana identyfikavać. Paśla ekśpiertyz Patapienku i Mahiłku pachavali jašče ŭ červieni. Cieła Dryšluka znajści nie ŭdałosia, jon doŭhi čas ličyŭsia źnikłym bieź viestak. Tolki 6 studzienia 2015 hoda jaho pryznali zahinułym. Paŭłu Dryšluku było paśmiarotna prysvojena zvańnie majora.
Siońnia jaho syn Kirył Dryšluk — asnoŭny paŭabaronca zbornaj Ukrainy U-20. Jon całkam adyhraŭ finał čempijanata śvietu, pieramožny dla svajoj kamandy.
Ukraina vyjhrała moładzievy čempijanat śvietu pa futbole
