Nievialiki kantraktny (nie maje svajoj placoŭki, a najmaje ŭ inšych) brovar Midnight Project Brewery zaŭtra na feście Lobotomy Day u Sankt-Pieciarburzie prezientuje svaju navinku, jakaja atrymała nazvu «Jakub Kołas». Pikantnaści dadaje toj fakt, što piva zvaranaje ŭ styli ruski impierski staŭt (RIS).
Čamu «Jakubam Kołasam» nazvali mienavita impierski staŭt? Pivavar Alaksiej Fadziejenka tłumačyć, što hetaje piva zvaryli sumiesna z varoniežskim brovaram Brewlock, a ŭ apošnich jość liniejka RISaŭ nazvanych u honar kłasikaŭ ruskaj litaratury: Dastajeŭski, Bunin, Bułhakaŭ, Płatonaŭ i inšyja. Ciapier hetaja «biblijateka» papoŭnicca i biełaruskim aŭtaram.
Što takoje ruski impierski staŭt? Heta mocnaje ciomnaje piva, radzima jakoha — Anhlija. Adkul u naźvie źjaviŭsia «ruski»? Prosta isnavała bajka, što mienavita takoje piva lubili pić pry impieratarskim dvary Ramanavych. Nijakaha paćvierdžańnia hetamu niama, ale nazva zamacavałasia. Impierski ž u piŭnoj halinie časta aznačaje padvojenaje ŭtrymańnie ałkaholu. Naprykład, isnujuć impierskija indyjskija blednyja eli, piłśniery, portary i h.d.
Zimoj sioleta publicyst i paet Staś Karpaŭ u svaim fejsbuku inicyjavaŭ dyskusiju, što styl ruski impierski staŭt u siońniašniaj Biełarusi isnavać nie moža.
«Mnie b było b pochier, kali b tut pradavałasia brytanskaje impierskaje piva ci ispanskaje impierskaje vino. U ich niama impieryjaŭ. A ŭ nas niama niebiaśpieki stać častkaj Anhlii ci Ispanii. I ja nie źbiraŭsia ŭklučać pafas babulki-pravaabaroncy, ale, kali kraina nazyvaje siabie impieryjaj i pakrysie adžyraje terytoryi u susiedziaŭ, słova «impierski» stanovicca niebiaśpiečnym. A kali jana ŭsie słavianskija ziemli nazyvaje «ruskimi», to bok «rasijskimi», to i hetyja słovy stanoviacca vartymi nahladu», — zaznačaŭ Karpaŭ.
