«Chočam, kab dypłamaty, jakija pracujuć u nas, adčuvali siabie ŭ nas, jak doma», — kaža ministr zamiežnych spraŭ Biełarusi Uładzimir Makiej, jaki sustrakaje haściej na śviacie «U Biełarusi, jak doma», što arhanizujecca MZS treci hod zapar dla ambasadaraŭ i pradstaŭnikoŭ dypmisij ź siemjami, piša Tut.by.
Pryjom tradycyjna prachodziŭ u Dipservice Hall. Uładzimir Makiej z žonkaj, viadomaj aktrysaj Vieraj Palakovaj i synami pryjechali adnymi ź pieršych, kab sustrakać haściej. Pakolki śviata praduhledžvała, što ŭsie zaprošanyja buduć u nacyjanalnych kaściumach, mužčyny siamji ministra byli ŭ vyšyvankach, a Viera Palakova — u raskošnaj sukiency-vyšyvancy.
— Zaraz hod małoj radzimy, i ja vyrašyła, što heta vydatny varyjant. Zavuć žančynu Maryna Banifaćcieŭna, vielmi joj udziačnaja. Dva dni — i ja ŭ zusim novym ubory, — raspaviadaje Palakova.
Uładzimir Makiej pryznaŭsia, što vyšyvanku apranaje nie raz u hod na pryjom, ale i nie tak časta, jak chaciełasia b.
— Dumaju, kožny z nas pavinien uziać na siabie abaviazacielstvy chadzić čaściej u vyšyvancy i havaryć na rodnaj biełaruskaj movie, — kaža ministr.
U hetym hodzie na śviata zaprasili kala 200 haściej. Praŭda, nie ŭsie pasły pryjšli ŭ nacyjanalnych kaściumach.
— Skazali ŭ nacyjanalnym — ja pryjšoŭ u nacyjanalnym, — pažartavaŭ pasoł Izraila Ałon Šaham, pakazvajučy svoj pinžak, pašyty ŭ Izraili. Letaś ambasadar tłumačyŭ, što nacyjanalnaha adzieńnia ŭ izrailcian niama.
Pasoł Rasii Dźmitryj Mieziencaŭ taksama pryjšoŭ u zvyčajnym kaściumie. Ale skazaŭ, što ŭžo źniaŭ mierki i ŭ nastupnym hodzie abaviazkova pryjdzie ŭ nacyjanalnym stroi. Makieju i jaho žoncy pasoł padaryŭ pano, a małodšamu synu — Arciomu — aŭtohraf Cimaci.
A voś pasoł Šviecyi ŭ Biełarusi Kryścina Juchaniesan uraziła ŭsich: dypłamat pryjšła ŭ nacyjanalnym stroi svajoj babuli, jakomu 100 hadoŭ.
— Letaś mianie zaprasili na hety viečar i mnie nie było čaho nadzieć. Tamu ŭzimku ja pajechała da mamy i ŭziała hety kaścium. Jaho zrabiła maja babula, kali była zusim maładoj dziaŭčynaj, amal 100 hadoŭ tamu, kali jana pajšła vučycca ŭ himnaziju. Tady była takaja tradycyja: kali dziaŭčyna išła vučycca, jana pavinna była sama pašyć sabie kaścium. Kaścium z poŭnačy Šviecyi, paŭnočnyja rehijony ŭ nas tradycyjna byli nie takija bahatyja, jak paŭdniovyja, tamu ŭ kaściumach nie vykarystoŭvali čyrvonaha koleru — heta prykmieta bahaćcia. Tut prysutničajuć tolki sini, žoŭty i zialony kolery. Samaje składanaje — heta hałaŭny ŭbor — jon na mnie amal nie trymajecca. Maja babula sama vytkała tkaninu i potym pašyła kaścium, i ja vielmi hanarusia, što siońnia mahu jaho nasić, — raspaviała Kryścina Juchaniesan.
