Siońnia ŭ Minsku ŭ rytualnaj zale na vulicy Alšeŭskaha raźvitalisia z zahinułaj padčas salutu na Dzień Niezaležnaści. Vykazać spačuvańni pryjechali ŭłady horada i Minabarony, piša Tut.by.
U 11:50 kala rytualnaj zały pa vulicy Alšeŭskaha stajać z kvietkami kalehi zahinułaj Natalli Mikałajeŭny Maksimčuk. Ich čałaviek 30. Jany pryjechali raźvitacca z žančynaj, niekatoryja ź joj prapracavali 17 hadoŭ bok ab bok.
Natalla Mikałajeŭna pracavała ŭ kamiercyjnym Instytucie kiravańnia i pradprymalnictva ŭ Minsku ŭ vučebna-mietadyčnym adździele. Joj było 64 hady, i jana ŭžo niekalki hadoŭ była na piensii.
— Jana była aptymistka, vielmi prystojnaja, dobrazyčlivaja, ŭmieła razumieć i prymać radaści i niahody žyćcia. Heta samaje hałoŭnaje. Jana ŭmieła radavacca, kali ŭsio dobra. A kali niejkija niaščaści — padtrymaje, pryčym vielmi dalikatna, vielmi nienaviaźliva. Uśmieška — heta jaje fłahman, — havorać jaje kalehi z VNU.
Kalehi zahinułaj pryjšli ź joju raźvitacca z kvietkami i viankami, z saboj prynieśli fatahrafiju Natalli Mikałajeŭny.
Niekatoryja ź ich nie mohuć strymać śloz, kažuć, što da hetaha času nie vierać, što takaja trahiedyja adbyłasia. Ci časta žančyna chadziła na takija parady i saluty, jany nie viedajuć. Kažuć, u toj dzień vyjechała ŭ centr horada, kab sustrecca z rodnymi.
— Dva miljony čałaviek u Miensku — i zahinuŭ adzin. Los taki, — skroź ślozy uzdychaje kaleha.
Siabry pa pracy kažuć, što pa žyćci Natalla Mikałajeŭna była aktyŭnym čałaviekam.
— Chadziła ŭ teatry, na vystavy, dziaciej kudyści vadziła. Jana ŭ VNU da apošniaha ŭ valejboł hulała: u nas vykładčyki źbirajucca i hulajuć u valejboł. Siamja dla jaje była samym hałoŭnym: muž, dzieci, unuki. Jana navat dekret afarmlała na siabie, kab dačka vyjšła na pracu. Pry hetym jana zaŭsiody mołada vyhladała, zaŭsiody była dahledžanaja, — kaža jaje kaleha.
Raźvitacca z Natallaj Mikałajeŭnaj padjazdžaje Natalla Valerjeŭna. Heta čałaviek, jaki doŭhi čas kiravaŭ pracaj Natalli Mikałajeŭny ŭ VNU. Jany bolš za dziesiać hadoŭ prapracavali «vočy ŭ vočy» ŭ adnym kabiniecie, razam adznačali śviaty, piakli bliny na Maślenicu, jeździli na daču i chadzili ŭ kino.
— Maja kaleha jašče 4 lipienia paprasiła napisać što-niebudź pra Natallu Mikałajeŭnu. Ja čatyry skazy pisała try hadziny: jak pačała płakać, tak i nie pierastała da hetaha času, — kaža jana. — Tak niedarečna ŭsio skončyłasia.
Natalla Valerjeŭna nie moža strymać śloz i siońnia.
U rytualnaj zali, schiliŭšysia nad trunoj, siadzić muž Natalli Mikałajeŭny — Juryj Ivanavič i adzinaja dačka Alesia. Vakoł stajać vianki, lažać žyvyja hvaździki i ružy.
Vykazać spačuvańni pryjechali z administracyi Frunzienskaha rajona Minska. Dvoje mužčyn u kaściumach ŭnieśli ŭ rytualnuju zału vianok ad horada Minska.
Ułady horada taksama pryjechali raźvitacca z zahinułaj i paabiacali, što dapamohuć siamji.
— Dla mianie heta ŭdvaja trahiedyja, tamu što zahinułaja — žycharka našaha rajona. U taki śvietłaje i śviatoje dla ŭsiaho naroda śviata adbyłosia takoje nadzvyčajnaje zdareńnie, i my nie mahli pakinuć siamju pa-za ŭvahaj. Usiu dapamohu, jakuju my mahli akazać i akažam ŭ dalejšym, my akažam, — skazaŭ kiraŭnik Administracyi Frunzienskaha rajona Minska Siarhiej Škrudnieŭ.
Udzielniki raźvitańnia z Natallaj Mikałajeŭnaj, raspaviali, što kiraŭnik administracyi rajona vykazaŭ spačuvańni siamji i ŭ rytualnaj zali doŭha pra niešta havaryŭ z dačkoj zahinułaj. Mienavita jana ŭ dzień śmierci była razam z mamaj na nabiarežnaj Śvisłačy.
Vykazać spačuvańni pryjechali ź Ministerstva abarony.
Vykazać spačuvańni pryjechali i pradstaŭniki Minabarony, siarod ich pres-ataše ministra Natalla Haŭrusik. Ad kamientaroŭ žurnalistam supracoŭniki Minabarony admovilisia.
