U noč na 6 lipienia ŭ ahraharadku Stryhava (Kobrynski rajon) adbyŭsia dziŭny suicyd. Małady mužčyna zabiŭ siabie ŭ milicejskaj mašynie.
Čytajcie: U Kobrynskim rajonie debašyr zabiŭ siabie ŭ milicejskaj mašynie
«Naša Niva» daviedałasia niekatoryja detali hetaj historyi.
33-hadovy Dźmitry Zacharčenia žyŭ u ahraharadku Stryhava na vulicy Savieckaj. Byŭ žanaty, mieŭ dvaich dziaciej: piać i siem hadoŭ. Pracavaŭ na budaŭničaj firmie vachtavym mietadam. Tydzień pravodziŭ doma, na tydzień źjazdžaŭ na pracu ŭ Kobryn.
Susiedka Nina Vieniadziktaŭna kaža, što siamja Zacharčeniaŭ była prablemnaja.
«Dzima ŭ toj siamji byŭ samy adekvatny, ja navat nie razumieŭ, čaho jon ź imi žyvie», — kaža inšy susied.
Milicyja raniej paviedamlała, što Dźmitryj pryciahvaŭsia da adkaznaści praź siamiejnyja skandały.
Pa słovach susiedziaŭ, u noč trahiedyi mužčyna kali i byŭ pjany, to nie mocna. Dy jašče i nibyta sam vyklikaŭ milicyju.
«Ja była ŭ ich za paŭhadziny da toj biady. Heta było kala pałovy na druhuju nočy.
Jany šumieli, voś i vyrašyła zajści. Tam była milicyja, dvoje supracoŭnikaŭ. I Dzima im kazaŭ: «Čaho vy na mianie najazdžajecie, ja ž sam vas vyklikaŭ!» Ź jaho słovaŭ ja zrazumieła, što prapaŭ rovar, i Dzima pazvaniŭ u 102», — kaža Nina Vieniadziktaŭna.
Pa słovach susiedki, pra dalejšyja padziei jana dakładna nie viedaje.
Ale vynikaje, što Dźmitryja vyvieli z chaty i pasadzili ŭ toj samy milicejski HAZ, u adsiek dla zatrymanych.
«Ale jaho navat nie paśpieli nikudy advieźci! Praz chvilin moža 20 ja hladžu — staić toj HAZ pad domam, a pobač mašyna chutkaj dapamohi. Ja vyjšła na vulicu. Sustreła ciešču Zacharčeni. Jana mnie kaža: «Dzima paviesiŭsia!»
Ja pytajusia: jak, na čym?!
I milicyjant kaža: «Jon uziaŭ šnurok, zaviazaŭ na šyi i rukami mocna jaho zaciahnuŭ. Supracoŭnik siadzieŭ u mašynie, ale vyratavać jaho nie paśpieŭ».
Susiedzi — dy i inšyja žychary Stryhava — nie nadta vierać u suicyd.
«Jon nie sam zahinuŭ, heta dakładna», — miarkujuć pradavački ŭ miascovaj kramie.
Dy i susiedka Nina Vieniadziktaŭna paciskaje plačyma: «Moža być, Dzima ŭ mašynie «ŭźnikać» pačaŭ? Bo vyhladaje heta ŭsio padazrona, jon ža sam vyklikaŭ milicyju».
Milicyja paviedamiła, što pa spravie pravodzicca pravierka.
