«My zaniali druhoje miesca, i ja zasmuciŭsia». Idzie sud nad chakieistam, jakoha złavili z narkotykami

Były hulec moładzievaj kamandy «Junactva» abvinavačvajecca pavodle 328-ha artykułu Kryminalnaha kodeksu, paviedamlaje Radyjo Svaboda.

Hetaja historyja pačałasia poźnim viečaram 1 krasavika 2019 hodu. Milicejski patrul z Centralnaha RUUS Mienska sustreŭ na praspekcie Pieramožcaŭ dvuch chłopcaŭ spartovaha vyhladu. Chłopcy, zaŭvažyŭšy milicyjantaŭ, zachvalavalisia i pačali niešta chavać pa kišeniach. A kali patrul paprasiŭ pakazać, što tyja chavajuć, dastali plastykavyja kantejnery z prasavanym rečyvam raślinnaha pachodžańnia i šklanyja trubki. Paźniejšaja ekspertyza pakazała, što prasavanaje rečyva — heta hašyš i nasvaj. Abodvuch chłopcaŭ zatrymali. Jany akazalisia napadnikam i abaroncam mienskaha chakiejnaha klubu «Junactva».

Zaharadnaja viečarynka adnaklubnikaŭ

Pavodle aficyjnaha paviedamleńnia na sajcie MUS, apublikavanaha nieŭzabavie paśla sustrečy chakieistaŭ ź milicyjantami na praśpekcie Pieramožcaŭ, narkotyki ŭ CHK «Junactva» ŭžyvali nia tolki zatrymanyja.

«Supracoŭniki adździaleńnia narkakantrolu i supraćdziejańnia handlu ludźmi Centralnaha RUUS vyśvietlili, što da raspaŭsiudžvańnia narkotyku niepasrednaje dačynieńnie majuć jašče dva chakieisty klubu, ich zatrymali na nastupny dzień, — paviedamlała milicyja. — Taksama była atrymanaja infarmacyja, što kanfiskavany hašyš — reštki paśla niadaŭniaj zaharadnaj viečarynki adnaklubnikaŭ… Pravaachoŭniki buduć vyśviatlać schiemy raspaŭsiudžvańnia narkotyku ŭ kamandzie, nakolki doŭha i rehularna jaje čalcy ŭžyvali zabaronienyja rečyvy, jakoje koła chakieistaŭ (i nia tolki ich) udzielničała ŭ hetym».

Nieŭzabavie paśla hetaha na šerahu spartovych sajtaŭ źjaviłasia infarmacyja, što ŭsie zatrymanyja źjaŭlajucca hulcami moładzievaj kamandy «Junijor», jakaja ŭvachodzić u strukturu CHK «Junactva». Taksama stała viadoma, što maładych chakieistaŭ vypuścili z-pad varty, uziaŭšy abaviazańnie ab jaŭcy na patrabavańnie śledčych.

«Ja bolš tak nia budu»

15 lipienia stała viadoma, što pieršaje sudovaje pasiedžańnie ŭ spravie ab narkotykach u chakiejnym klubie «Junactva» adbudziecca 18 lipienia. Pry hetym z paviedamleńnia pradstaŭnicy Viarchoŭnaha sudu Nastaśsi Šylvian vynikała, što na łavie padsudnych tolki adzin z čatyroch chakieistaŭ, pra jakich u krasaviku raskazała milicyja.

«Sud Centralnaha rajonu Miensku pačynaje sudovy razhlad kryminalnaj spravy ŭ dačynieńni M., — havaryłasia ŭ paviedamleńni. — Na momant zatrymańnia — spartoŭca-instruktara chakiejnaha kluba «Junactva-Miensk». Ab niezakonnym abaračeńni narkotykaŭ (abvinavačvajecca ŭ nabyćci hašyšu masaj bolš za 0,07222 hrama, jaho zachoŭvańni i pieravozcy pa terytoryi Respubliki Biełaruś)».

Praces pačaŭsia rankam 18 lipienia ŭ sudzie Cetralnaha rajonu. Abvinavačany Mikita Makarčyk pryjšoŭ na pasiedžańnie samastojna, razam z advakatam.

Padčas pramovy prakurora vyśvietliłasia, što kožnaha z zatrymanych pavodle 328-ha artykułu chakieistaŭ chakiejnaha klubu «Junactva» buduć sudzić asobna. Makarčyka abvinavacili ŭ častcy 1 artykułu 328.

«Pieršaha krasavika ja pryjšoŭ na treniroŭku, — pačaŭ raskazvać svaju historyju chakieist. — Patrenavalisia, potym adzin z adnaklubnikaŭ, Šumiejka, prapanavaŭ mnie dy inšym chłopcam hašyš. Heta zdaryłasia ŭ sušyłcy paśla treniroŭki. Jon prosta daŭ nam plastykavy kantejner. Ja ŭziaŭ. Razam z druhim adnaklubnikam my paśla pajšli ŭ horad, pajeli ŭ adnym z restaranaŭ sietki chutkaha charčavańnia, vypili piva. Paśla hetaha vyrašyli pakuryć hašyš. Nabyli ŭ aptecy dla hetaj mety šklanyja pipietki. Pajšli za kinateatar «Maskva» i tam zrabili niekalki zaciažak. Potym nas zatrymaŭ patrul».

Abvinavačany Makarčyk 1999 hodu naradžeńnia z Horadni. Chakiejem zajmajecca z 6 hadoŭ. Advakat Makarčyka źviarnuła ŭvahu sudździ na toje, što jon pachodzić sa šmatdzietnaj siamji (maje traich małodšych bratoŭ i siaścior), vychoŭvaŭsia baćkam, maci pamierła, kali abvinavačanamu było 6 hadoŭ. Paśla 1 krasavika chakieista adchilili ad pracy z kamandaj, jon trenujecca samastojna dvojčy na dzień 6 dzion na tydzień.

«Heta byŭ pieršy raz, kali ja paspytaŭ narkotyki, — skazaŭ u svajo apraŭdańnie abvinavačany. — Ja nie adčuŭ nijakaha efektu. My napiaredadni zaniali druhoje miesca ŭ čempijanacie, krychu zasmuciŭsia. Ja bolš nia budu tak rabić, abiacaju».

Na ŭdakładnialnyja pytańni prakurora pra toje, adkul jon viedaŭ pra sposab kureńnia hašyšu z dapamohaj šklanoj pipietki, Makarčyk patłumačyŭ, što ŭsiamu jaho navučyŭ adnaklubnik Šumiejka.

Śviedki ŭ sud nie źjavilisia. Pavodle materyjałaŭ spravy, ich bolš za piać čałaviek. Niekatoryja taksama źjaŭlajucca chakieistami «Junactva». Prakuror nie nastojvała na abaviazkovaj jaŭcy śviedak na praces. Razhlad spravy zaniaŭ krychu bolš za 30 chvilin.

Prakuror paprasiła pakarać Makarčyka 3 hadami abmiežavańnia voli biez nakiravańnia ŭ miescy pazbaŭleńnia voli.

• 0
• 0
• 0
• 0
• 0
• 0
• 0
• 0