Alaksandr Łukašenka prapanoŭvaje da 20-hodździa sajuznaj damovy ŭ śniežni 2019 hoda źniać usie prablemnyja pytańni ŭ adnosinach Biełarusi i Rasii. Ab hetym jon zajaviŭ siońnia na pieramovach z Uładzimiram Pucinym, pieradaje BiełTA.
Sustreča lidaraŭ dźviuch krain papiaredničaje ich udzieł u plenarnym pasiadžeńni VI Forumu rehijonaŭ Biełarusi i Rasii. Jak paviedamlałasia, u centry ŭvahi buduć pytańni raźvićcia handlova-ekanamičnaha supracoŭnictva pamiž Biełaruśsiu i Rasijaj. Baki taksama abmiarkujuć uzajemadziejańnie ŭ ramkach Sajuznaj dziaržavy.
«U śniežni 20 hadoŭ našaj sajuznaj damovie. Nivodnaj prablemy, ja tak miarkuju, my nie pavinny vynieści za miežy hetaha terminu. Heta nas padciskaje. Što my budziem kazać u 20-hodździe? Nie budzie čaho skazać, kali my nie zdymiem usie pytańni, jakija jość, i nie padpišam prahramu, jakaja vyznačyć stratehiju našych sumiesnych dziejańniaŭ. Tamu ja prapanuju źniać usie pytańni da hetaj daty. I ŭ ramkach Vyšejšaha dziaržsavieta, ci jak my damovimsia, usio heta zaćvierdzić, i prahramu, jakaja vyznačyć stratehiju našych dziejańniaŭ, i źniać biahučyja prablemy», — skazaŭ biełaruski kiraŭnik.
Uładzimir Pucin adznačyŭ nieabchodnaść pradoŭžyć dyskusii, pačatyja jašče napiaredadni na niefarmalnaj sustrečy, a taksama abmierkavać pytańni mižrehijanalnaha supracoŭnictva. «Usio heta vielmi važna, cikava, pierśpiektyŭna i karysna. U nas pracuje ŭradavaja kamisija, jakaja, spadziajusia, siońnia nam dałožyć ab vynikach raboty pa dalejšym raźvićci Sajuznaj dziaržavy. U hetym hodzie ŭ nas jubilej u śniežni. Tamu my z Alaksandram Ryhoravičam vyrašyli praanalizavać usio, što zroblena ŭ ramkach sajuznaj damovy, što nie zroblena, pa jakich pryčynach. I vypracavać prymalnyja dla našych krain šlachu dalejšaha raźvićcia intehracyi «, - skazaŭ rasijski lider.
Jon asabliva padkreśliŭ, što Biełaruś, biezumoŭna, źjaŭlajecca samym blizkim stratehičnym partnioram i sajuźnikam Rasii. «My pracujem pa ŭsich napramkach. I ŭ śfiery biaśpieki, i vajennaj spravy, u abaroncy, u ekanomicy. U nas raście tavaraabarot, što nie moža nie radavać. Rasija źjaŭlajecca najbujniejšym inviestaram u ekanomiku Biełarusi», — dadaŭ prezident Rasii.
«Ale jość i pytańni, jakija zaŭsiody ŭ miežach takoj vialikaj sumiesnaj pracy ŭźnikajuć. Spadziajusia, što i siońniašniaja sustreča pojdzie na karyść dla taho, kab ruchacca dalej», - skazaŭ Uładzimir Pucin.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ20
Kamientary