U Bieraści za aknom visić «kachanak Hieorhij». U čym prykoł?
Cikavy art-abjekt jość u Bieraści. U akno druhoha paviercha lezie mužčyna ŭ adnych majtkach, na padvakońni lažyć jaho kapialuš. Pobač znak z tłumačeńniem: kali vy trapicie ŭ kapialuš manietkaj, to vam paščaścić u kachańni.
«Kachanak Hieorhij», tak nazyvajecca instalacyja, źjaviŭsia ŭ Bieraści niekalki hadoŭ tamu i pastupova abrastaje novymi detalami. To pobač ź im źjavicca kapialušyk dla manietak, to na 14 lutaha Hieorhij «ažyvaje». Nie tak daŭno namahańniami miascovaj mastački Hanny Radźko historyja Hieorhija uvasobiłasia ŭ paŭnavartasny art-abjekt. Lehiendu možna pračytać naŭprost na ścianie doma i vačyma mastački ŭbačyć, jak ža mahli vyhladać hieroi hetaj historyi.
Źjaŭleńnie ŭ horadzie Hieorhija — heta danina adnoj haradskoj lehiendzie. U pačatku 20 stahodździa ŭ domie na rahu vulicy Kryvoj (tak raniej nazyvałasia vulica Dziaržynskaha) žyła siamja Vujčyk. Kapitan polskaj armii Andžej i jaho maładaja žonka Vacłava, jakaja była maładziejšaja za muža na 20 hadoŭ. U jaje byŭ kachanak Hieorhij — małady i dziorzki amatar žančyn i svavolnictvaŭ. U kvateru svajoj paluboŭnicy Hieorhij traplaŭ pa vadaściokavaj trubie. Akno na druhim paviersie viało akurat u spalniu. Adnojčy zdrada maładoj žonki raskryłasia. Ašukany muž padpilnavaŭ Hieorhija i streliŭ jamu akurat u serca. Maładaja žonka nie zmahła žyć paśla takoha i na nastupny dzień pryniała atrutu.
Choć instalacyja ŭžo dobra viadomaja bieraściejcam, cikavaść da jaje nie hublajecca. Pa-pieršaje, tamu, što paluboŭnik Hieorhij toj jašče modnik. U jaho harderobie niekalki roznakalarovych majtak, kašul i škarpetak.
Dahladaje za Hieorhijem ahienctva «Biuro śviataŭ». My zapytalisia ŭ ich, jak časta Hieorhij mianiaje svaje ŭbory.
«Kamplektaŭ uboraŭ u Hieorhija šmat. Jość aficyjnyja kaściumy dla ŭračystaściaŭ i asablivych mierapryjemstvaŭ, jość štodzionnaje adzieńnie i adzieńnie dla adpačynku. Ubory da kalandarnych śviataŭ — Novy hod, Dzień śviatoha Valancina, 8 Sakavika… U jaho jość viazanyja škarpetački na chałady i navat kaścium honščyka», — raspaviadajuć u Biuro.
Pieraapranajuć paluboŭnika z zaležnaści ad nadvorja i nastroju kalektyvu.
«Adzieńnie Hieorhija zachoŭvajecca ŭ ofisie, u nas jość cełaja šafa tolki dla jaho», — udakładnili ŭ Biuro.
Za čatyry hady isnavańnia Hieorhija ź jaho źniali majtki tolki adzin raz. I jašče napisali nieprystojnaje słova na piataj kropcy.
«Adnojčy niejki narkaman skraŭ u Hieorhija… nahu. Ale praz dva tydni nahu viarnuŭ. Ci to sumleńnie razhulałasia, ci to naha nie spatrebiłasia. My znajšli jaje na padvakońni druhoha paviercha», — raskazvajuć u «Biuro śviataŭ».
Ideja z manietkami vielmi spadabałasia turystam, u kapialušyku zaŭsiody jość hrošy. Častka hetych hrošaj idzie na korm dla ofisnaha kata Žoryka.
Pakoj, u jaki hladzić Hieorhij, źjaŭlajecca ofisam dyrektara ivent-ahienctva «Biuro śviataŭ». Dyrektar pryznajecca, što prysutnaść Hieorhija adčuvaje pa sabie. Časam padajecca, što ŭ pakoi jość jašče niechta.
Kamientary