Byvaj, panie Maniuška! Na adkryćci siezona ŭ Biełaruskaj opiery — nivodnaha tvora biełaruskich kampazitaraŭ
Piša doktar historyi (i miełaman) Alaksandr Bieły.
Smutak vyklikaŭ anons kancerta «Šedeŭry suśvietnaj opiery», jakim Nacyjanalny akademičny vialiki teatr opiery i baleta Biełarusi adkryje novy siezon 18 vieraśnia ŭ kamiernaj zale imia Łarysy Aleksandroŭskaj. Jak anansujecca, padčas kancertu prahučać aryi i duety — vybitnyja ŭzory ruskaj i zachodniejeŭrapiejskaj muzyki Mikałaja Rymskaha-Korsakava, Piatra Čajkoŭskaha, Alaksandra Baradzina, Madesta Musarhskaha, Džuzepe Vierdzi, Džakama Pučyni, Kamila Sien-Sansa. Chaču ŭdakładnić, što smutak vyklikajuć nie sami hetyja kampazitary, ale adsutnaść u hetym pavažnym śpisie choć jakoha namioku na nacyjanalny muzyčny panteon.
Skandalnaj vyhladaje adsutnaść u im tvoraŭ Stanisłava Maniuški, čyj 200-hadovy jubilej my śviatkujem sioleta. Chacia voś tolki što, zdavałasia, ŭ mai u Opiery ź vialikim pośpiecham adbylisia 2 kancerty, adzin ź jakich u značnaj stupieni byŭ pryśviečany mienavita opiernaj spadčynie Maniuški. U jubilejnych pramovach i artykułach hučali dyfiramby ŭ adras našaha hienijalnaha ziemlaka, ale mnie tady padumałasia: što budzie kali jubilej praminie?
I voś kali łaska: vybitnyja ŭzory ruskaj i zachodniejeŭrapiejskaj muzyki, ale nie tutejšaj, biełaruskaj dy litvinskaj. Nu ŭ jakoj jašče krainie śvietu takoje mahčyma? Kaniečnie, opiernaje mastactva — adno z samych kasmapalityčnych. Ale ciažka ujavić brytanskuju opiernuju scenu bieź Piorsieła i Hiłbierta z Salivanam, ruskuju — biez tych ža Čajkoŭskaha dy Baradzina. Našu, jak vyśviatlajecca — biez Maniuški i ŭvohule bieź lubych našych kampazitaraŭ — možna. Heta datyčyć usiaho repiertuaru teatru, jaki nazyvaje siabie «Vialikim» i «Nacyjanalnym». Nie tolki ŭ inaŭhuracyjnym kancercie, ale i ŭ repiertuary ŭ cełym, hod za hodam. Składajecca ŭražańnie, što kiraŭnictva Opiery naŭmysna paźbiahaje nacyjanalnaha repiertuaru. Siezon adkryvaje «Kniaź Ihar», na inaŭhuracyjnym kancercie — nivodnaha biełaruskaha tvora.
Paraŭnajcie z adkryćciom siezona ŭ Pražskaj Opiery: akramia Džardana i Vierdzi prahučać i Dvoržak, i Śmietana, i Janaček.
Kryŭda i biaśsille. Stvaryŭ pietycyju na Change.org «Viarnicie tvory Maniuški dy inšych «tutejšych» kampazitaraŭ u repiertuar Nacyjanalnaha teatra!».
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym3
Kamientary