Rasijskija stratehi narešcie ažyćciavili svoj idefiks — damahlisia adzinaj ź Biełaruśsiu rehijanalnaj sistemy supraćpavietranaj abarony. Pahadnieńnie padpisana 3 lutaha ŭ Maskvie.
Adrazu zaznaču: nie treba błytać, jak heta časta robiać žurnalisty-nieafity, supraćpavietranuju i supraćrakietnuju abaronu. Padpisanaja zaraz damova nie vyhladaje jak adkaz na amierykanskija płany i tamu nie vykliča vostraj reakcyi na Zachadzie.
Biezumoŭna, lubaja dadatkovaja pryviazka da Maskvy nie na karyść biełaruskamu suvierenitetu. Razam z tym, de-fakta rasijskija i biełaruskija siły SPA ščylna ŭzajemadziejničali i dasiul, havorka pra jurydyčnaje afarmleńnie.
Kaniečnie, djabał toicca ŭ detalach. Ale, ličyć minski vajskovy analityk Alaksandr Alesin, ź jakim ja tolki što mieŭ havorku, i jurydyčna prycisnuć biełaruskaha kiraŭnika da ścienki ŭ pytańni SPA rasijcam, badaj, nie ŭdałosia.
Sa słoŭ Alesina, u pracesie padrychtoŭki prajekt stanaviŭsia ŭsio bolej ahulnym, raspłyvistym, i ŭ vyniku, nakolki možna mierkavać (treba, kaniečnie, pabačyć kančatkovy varyjant), Minsk pakinuŭ sabie peŭnuju samastojnaść, «umoŭna kažučy, pryncyp dvuch klučoŭ». Nie kažučy pra toje, što pad hetu marku vybity čarhovyja prefierencyi: adnosna tanny haz, abiacańnie novaha kredytu na niekalki dziasiatkaŭ miljardaŭ rasijskich rubloŭ i h.d.
Inšaja reč, što poŭnaja cana rasijskich piernikaŭ nieviadomaja. Na dumku ekanamista Leanida Zaiki, zaraz, kali kryzis na vačach źjadaje reštki našaha «ekanamičnaha cudu», u Maskvy dobryja šancy zmusić Łukašenku da ŭviadzieńnia adzinaj valuty.
I sapraŭdy, pamočnik Miadźviedieva Prychodźka paśla pasiadžeńnia Najvyšejšaha dziaržsavieta sajuznaj dziaržavy paviedamiŭ, što
baki raspracavali płan sumiesnych dziejańniaŭ pa ŭviadzieńni adzinaj valuty. Sa słoŭ Prychodźki, u płanie «prapisany kankretnyja instrumienty».
Situacyja niežartoŭnaja. Chacia Stanisłaŭ Bahdankievič, ź jakim ja taksama pahutaryŭ zaraz pa haračych śladach, ličyć: valutnaja kapitulacyja pakul što małaimaviernaja, biełaruski bok «znoŭ vykrucicca». Jašče bolej, navat prajekt zrabić rasijski rubiel rehijanalnaj reziervovaj valutaj vyhladaje siońnia chistka, bo jon zaraz valicca navat chutčej, čym biełaruski. Alternatyvaj ža kapitulacyi pierad Maskvoj jość, sa słoŭ Bahdankieviča, ekanamičnyja reformy, na jakija choćki-niachoćki Łukašenka zaraz musić iści.
Dadamo: ale ci chopić porachu?
Darečy, niekalki hadoŭ tamu byŭ precedent, kali Łukašenka, adbivajučysia ad valuty ź dźviuchhałovym arłom, apielavaŭ da aŭtarytetu apalnaha Bahdankieviča: maŭlaŭ, jość i ŭ apazicyi para razumnych ludziej, dyk voś jany suprać rasijskaha rubla...
Zaraz, kali što, manieŭr budzie zručna paŭtaryć: byłoha kiraŭnika Nacbanka zaprasili ŭ našumiełuju «hramadska-kansultatyŭnuju radu pry…».
U Minska bahaty dośvied, jak zamylić pytańnie ab adzinaj valucie. Zhodna z padpisanymi niekali papierami, rasijski rubiel musiŭ stać adzinym płaciežnym srodkam jašče z 2005 hoda. Ale Maskvu tady pradynamili.
Inšaja reč, što ciapier finansava-ekanamičnaja situacyja Biełarusi jak nikoli krytyčnaja.
