Šeść paciarpiełych padčas vybuchu i pažaru na vajennym palihonie ŭ Archanhielskaj vobłaści atrymali surjoznyja dozy radyjacyi i dastaŭlenyja ŭ Maskvu samalotami sanitarnaj avijacyi, śćviardžaje Telegram-kanał Baza, nie razhałošvajučy krynicu infarmacyi.
Pavodle jaho źviestak, usich šaścioch viazuć u fiederalny miedycynski bijafizičnyja centr imia Burnaziana, jaki źjaŭlajecca fłahmanskaj ustanovaj rasijskaj achovy zdaroŭja ŭ halinie bijafiziki, radyjacyjnaj i jadziernaj miedycyny. Kanał taksama nazvaŭ ich imiony: Ihar Biarezin, Siarhiej Płaksin, Alaksiej Pierapiołkin, Dźmitryj Abalin, Alaksandr Maniusin i Siarhiej Hryšyn.
Akramia hetaha Baza, spasyłajučysia na niekalki krynic u Minabarony Rasii, paviedamlaje, što ŭsiu vopratku paciarpiełych spalili adrazu paśla špitalizacyi. Anałahična zrabili i z kaściumami chimičnaj abarony i adzieńniem lekaraŭ, jakija pieršymi akazvali dapamohu paranienym.
Pra toje, što lekary, jakija pracavali z paciarpiełymi ŭ vyniku vybuchu na palihonie, byli apranutyja ŭ kaściumy chimabarony, paviedamlaŭ Telegram-kanał Mash, jaki 8 žniŭnia apublikavaŭ niekalki fota: miedyki ŭ adpaviednym ryštunku pobač ź viertalotam i reanimabil z numarnymi znakami Archanhielskaj vobłaści.
Minabarony RF nie kamientavała hetuju infarmacyju, ale adznačyła ŭ svaim pres-relizie, što «nijakich vykidaŭ škodnych rečyvaŭ u atmaśfieru nie było, radyjacyjny fon u normie».
Razam z tym ułady Sievieradźvinska, pablizu jakoha adbyłosia nadzvyčajnaje zdareńnie, paviedamlali ab trochrazovym pieravyšeńni dapuščalnaj normy radyjacyjnaha fonu na praciahu paŭhadziny paśla vybuchu. U adździele hramadzianskaj abarony administracyi horada zajavili, što heta nie niesła niebiaśpieki dla haradžan i što nieŭzabavie ŭzrovień radyjacyi rezka źniziŭsia, viarnuŭšysia ŭ miežy normy.
Na fonie hetych paviedamleńniaŭ vajskovyja ekśpierty z ZŠA, spasyłajučysia na spadarožnikavyja zdymki rajona vybuchu ŭ Dźvinskim zalivie Biełaha mora, zaŭvažyli tam transpartny tankier «Sierabranka», pryznačany dla zboru i zachoŭvańnia radyjeaktyŭnych adchodaŭ. Zrešty, z adkrytych krynic viadoma, što dadzienaje sudna rehularna ŭdzielničaje ŭ mierapryjemstvach pa transparciroŭcy adpracavanaha jadziernaha paliva i materyjałaŭ, pierš za ŭsio ŭtylizavanych atamnych padvodnych łodak, a taksama absłuhoŭvaje atamnyja ledakoły ŭ paŭnočna-zachodniaj častki Rasii.
Vybuch i pažar na palihonie ŭ Archanhielskaj vobłaści adbylisia dniom 8 žniŭnia. Heta zdaryłasia padčas vyprabavańnia vadkasnaha reaktyŭnaha ruchavika. Zahinuli dva śpiecyjalisty Minabarony RF, jašče šeść supracoŭnikaŭ viedamstva i nienazvanaha pradpryjemstva-raspracoŭščyka paciarpieli. U Minabarony nie raskryvali detali, ale ŭłady rehijonu zajaŭlali, što zdareńnie adbyłosia kala vioski Nionaksa — tam raźmieščany 45-y dziaržaŭny centralny marski vyprabavalny palihon VMF Rasii, dzie vypraboŭvajecca praktyčna ŭsio najnoŭšaje rakietnaje ŭzbrajeńnie, u tym liku rakiety stratehičnaha pryznačeńnia.
Pavodle infarmacyi krynic lenta.ru, zdareńnie moža być źviazana z vyprabavańniami mabilnaj puskavoj ustanoŭki dla hipierhukavaj rakiety «Cyrkon»; «Kamiersant», spasyłajučysia na adnaho z vajennych marakoŭ, pisaŭ, što vybuch moh adbycca ŭ vyniku razbureńnia rakiety i złučeńnia paliva z akiślalnikam, jakoje adbyłosia paśla.
