U Litvie rychtujucca da adkryćcia BiełAES: urad abiacaje vyłučyć 900 tysiač jeŭra na jod u tabletkach
Rychtujučysia da adkryćcia Astravieckaj AES u Biełarusi, litoŭski ŭrad abiacaje ŭ najbližejšy čas pryniać rašeńnie ab tym, jak finansavać kuplu jodu ŭ tabletkach, piša Delfi.
Jod u tabletkach vykarystoŭvajecca ŭ vypadku jadziernaj avaryi dla abarony arhanizma ad uździejańnia radyjacyi.
«Ministerstva achovy zdaroŭja ŭ ramkach svajoj kampietencyi prykłała ŭsie namahańni dla zabieśpiačeńnia žycharoŭ Litvy jodam ŭ tabletkach — pošuku pastaŭščykoŭ, uzhadnieńnia terminaŭ pastaŭki, kolkaści, kankretnaj upakoŭki i hetak dalej. Urad vyznačycca z krynicaj finansavańnia ŭ najbližejšy čas i zmoža praciahnuć praces zakupak», — paviedamiła BNS uradavaja kancylaryja.
Pavodle Ministerstva achovy zdaroŭja Litvy, z pastaŭščykom była dasiahnutaja damoŭlenaść ab tym, što nieabchodnaja kolkaść jodu ŭ tabletkach moža być dastaŭlena ŭ Litvu na praciahu adnaho miesiaca. Tabletki płanavałasia raspaŭsiudzić siarod nasielnictva da pačatku pracy elektrastancyi hetaj vosieńniu.
Raniej było abvieščana, što budzie zakuplena bolš za 4 miljony doz jodu ŭ tabletkach, pieršapačatkova dla raspaŭsiudžvańnia siarod tych, chto znachodzicca bližej da elektrastancyi na miažy krainy. Na heta płanujecca vyłučyć kala 900 tysiač jeŭra.
Kamientary