«Biełkamunmaš» rychtuje da vypusku dźvie novyja madeli elektrobusa
«Biełkamunmaš» rychtuje da sieryjnaj vytvorčaści dźvie novyja madeli elektrobusa ŭ troch madyfikacyjach, paviedamili «Minsk-Navinam» na pradpryjemstvie.
— Heta pierš za ŭsio Je-321 u dvuch varyjantach kuzava, — adznačaje dyrektar NTPC «Biełkamunmaš», hałoŭny kanstruktar Aleh Bycko. — Madel raźličana na jeŭrapiejskaha spažyŭca, dla jaje prymianiajucca darahija materyjały i kamplektujučyja. Daŭžynia takoha elektrobusa ź lityjevaj batarejaj składaje 12 mietraŭ. Kuzaŭ vyrableny sa zvyčajnaj kanstrukcyjnaj stali. U jakaści batarei, jak i ŭ minskim prajekcie, vykarystoŭvajem supierkandensatar.
Ale pry hetym całkam źmienieny eksterjer, interjer sałona i kabiny kiroŭcy. Płanujem prezientavać hety elektrobus u chutkim časie.
Druhaja madyfikacyja hetaj ža madeli — z elektrapartalnym mastom, u joj ruchaviki ŭbudavanyja ŭ stupicach kołaŭ. Maje tuju ž daŭžyniu, ale jość i adroźnieńni: kuzaŭ vyrableny ź nieržaviejučaj stali. Lityjevaja batareja dazvolić pieraadoleć svaim chodam adlehłaść da 200 kiłamietraŭ.
Surazmoŭca udakładniŭ, što pieršaja madyfikacyja Je-321 pryznačana i dla krain postsavieckaj prastory, druhaja — tolki dla Jeŭropy.
— Kančatkovaja cana jašče nie sfarmiravana, adzinkavyja, testavyja asobniki zaŭsiody darahija. Ale pry masavym vypusku košt elektrobusaŭ zaŭvažna źnižajecca. Nakidy na ich realizacyju jość, — kaža A. Bycko. — Jeŭrasajuz zaraz ažyćciaŭlaje prahramy pa ŭkaranieńni ekałahična čystaha pasažyrskaha transpartu, elektrobusaŭ i aŭtobusaŭ z vadarodnym ruchavikom. Na hetyja mety ŭžo vydzieleny sotni miljonaŭ jeŭra. Da prykładu, u susiedniaj Polščy ŭ hetym hodzie ŭ ahulnaj kolkaści nabytaha pasažyrskaha transpartu dziesiać pracentaŭ pavinny abaviazkova być elektrobusy, u 2020-m — 20, ŭ 2021-m — 30 pracentaŭ i hetak dalej. Anałahičnaja situacyja i ŭ šerahu inšych krain kantynienta. Naša pradpryjemstva ŭžo ŭdzielničaje ŭ pracedurach atrymańnia jeŭrapiejskich siertyfikataŭ, jakija dazvolać ažyćciavić pastaŭku dadzienaj techniki na zachodni rynak.
KDB aktyŭna viarbuje palitviaźniaŭ, vyzvalenych pa pamiłavańni — pravaabaroncy8
Kamientary