U najbližejšyja hady terytoryja Rakaŭskaha pradmieścia kardynalna źmienicca. Što mienavita?
Praz 2—3 hady terytoryja Rakaŭskaha pradmieścia źmienicca. U hetym hodzie tut pačałasia rekanstrukcyja budynkaŭ byłoha chlebazavoda, a na padychodzie — zabudova histaryčnaj Jurava-Zavalnaj vulicy, paviedamlaje karespandent ahienctva «Minsk-Naviny».
Z historyi
![](http://nashaniva.com/img/w732d4webp1/photos/z_2019_09/foto2258-j5t3l.jpg.webp)
Zabudova hetaj častki Minska farmavałasia na praciahu XVI—XIX stahodździaŭ. Da kanca XVIII stahodździa ŭ zachodniaj častcy adnaho z kvartałaŭ znachodzilisia abarončyja ŭmacavańni: vał, roŭ i ziemlanyja bastyjony. U kancy XVIII stahodździa na miescy zasypanaha haradskoha rova źjaviłasia vulica Jurava-Zavalnaja.
Rakaŭskaje pradmieście ŭ pieršaj pałovie XIX stahodździa było pieravažna draŭlanym. Kamiennyja žyłyja damy pačali ŭzvodzić paśla pažaru 1865 hoda. Na praciahu niekalkich stahodździaŭ tut sialilisia ramieśniki i drobnyja handlary. Na skryžavańni ciapierašnich vulic Rakaŭskaj i Viciebskaj ŭ 1892—1895 hadach była arhanizavana vytvorčaść špaler i hlancavaj papiery, u 1927-m pačaŭ pracavać chlebazavod №1. U 1968—1973 hadach asnoŭnaja častka pradmieścia była źniesiena ŭ suviazi z rekanstrukcyjaj vulicy Niamiha. Zachavałasia tolki nievialikaja častka damoŭ, jakija adnosiacca ŭ asnoŭnym da druhoj pałovy XIX — pačatku XX stahodździa.
Zavod pieratvarajecca…
![](http://nashaniva.com/img/w732d4webp1/photos/z_2019_09/x_02-n1rgr.jpg.webp)
Pakolki Rakaŭskaje pradmieście adnosicca da histaryčnaha centra Minska, vyrašana było prybrać adtul chlebazavod i pieraŭtvaryć jaho terytoryju, addaŭšy pad abjekty volnaha času i servisu.
U minułym hodzie pačalisia padrychtoŭčyja pracesy: źniesieny zavadskija haspadarčyja pabudovy, prakładzieny inžyniernyja sietki, dobraŭparadkavana prylehłaja zona. A ciapier idzie rekanstrukcyja vialikaha vytvorčaha budynka, jaki składajecca z dvuch karpusoŭ (vuł. Rakaŭskaja, 21). Dla vyhody jaho padzialili na dva asobnyja abjekty: dvuchpaviarchovy korpus budzie domam №1 pa hienpłanie, jaho vysotnaja prybudova — budynkam №2. Pakolki dom №1 adnosicca da historyka-kulturnaj kaštoŭnaści, jaho źniešni vyhlad budzie maksimalna adnoŭleny. Zachavajecca navat zavadskaja truba. A ŭnutry zrobiać pierapłaniroŭku, całkam zamieniać pierakryćci. Viadoma, što ŭ korpusie raźmieścicca nievialikaja piakarnia z kafe prykładna na 50 miescaŭ. Tut naviedvalniki zmohuć ubačyć, jak hatujecca chleb, a taksama pradehustavać śviežuju vypiečku. Astatnija pamiaškańni zojmie adukacyjny centr.
Dom №2 — heta vysotnaja častka asnoŭnaha vytvorčaha budynka, byłoje schovišča muki. Fasady hetaha budynka adnosiacca da historyka-kulturnaj spadčyny, tamu taksama zachavajucca ŭ maksimalna niaźmiennym vyhladzie. A voś ŭnutry ŭsio abnovicca. Užo demantavanyja staryja kanstrukcyi, umacavanyja vonkavyja ścieny, idzie ŭzmacnieńnie padmurka. U vyniku pieraŭtvareńniaŭ vieža-schovišča stanie šaściŭzroŭnievym korpusam. Na dvuch pieršych pavierchach płanujecca adkryć kafe na 60 miescaŭ. Zvonku arhanizujuć terasu, jakuju ŭ ciopły čas hoda možna vykarystoŭvać jak letniaje kafe abo pieratvaryć u placoŭku dla praviadzieńnia jakich-niebudź mierapryjemstvaŭ.
Na 3-m i 4-m pavierchach zapłanavany pamiaškańni ŭniviersalnaha pryznačeńnia, u jakich možna rabić, naprykład, vystavy. Na 5-m paviersie zadumany kafeteryj i maleńki mahazin dyzajnierskich tavaraŭ. Pavodle papiaredniaj infarmacyi, apošni pavierch, dakładniej dach, u letni čas inviestar maje namier vykarystoŭvać jak kinateatr pad adkrytym niebam.
Novyja budynki
![](http://nashaniva.com/img/w732d4webp1/photos/z_2019_09/h_15_08-o98dg.jpg.webp)
Na Rakaŭskaj vulicy pamiž pirahovaj i byłym vytvorčym korpusam chlebazavoda raźmieścicca novy budynak. Kab uznavić charaktar zabudovy histaryčnaha pradmieścia, jakaja isnavała, vyrašana było zaprajektavać niekalki damoŭ, u tym liku hety. U im na pieršym paviersie miarkujecca adkryć kafe nacyjanalnaj kuchni, nievialikuju kaviarniu i apteku, na druhim — stamatałahičny centr. Treci pavierch addaduć pad haściavyja apartamienty.
Ciapier pa susiedstvie prajektujecca šerah inšych novych budynkaŭ. Jak kažuć architektary, heta sproba pakazać zabudovu raniej isnujučaj Jurava-Zavalnaj vulicy. Absalutnaja histaryčnaja dakładnaść tut niemahčymaja, budynki tolki pa svaich paramietrach i raźmiaščeńni buduć nahadvać staroje pradmieście.
— U chodzie prajektavańnia navat pamianialisia padychody da architekturnaj kancepcyi, — raspaviadaje hałoŭny architektar prajektaŭ UP «Minskprajekt» Hanna Urban. — Z samaha pačatku praduhledžvaŭsia krychu inšy vobraz zabudovy — tynkoŭka na ścienach, niejki dekor na fasadach. Ale Ministerstva kultury ŭzhadniła adzin z novych budynkaŭ z fasadam z klinkiernaj čyrvonaj cehły, biez usialakaha dekoru, kab było vidać — heta sučasny abjekt, a nie pierajmańnie histaryčnaj pabudovy. Inšyja inviestary taksama zachacieli vykarystoŭvać čyrvonuju cehłu dla azdableńnia budynkaŭ. Ideja znajšła padtrymku i była zaćvierdžana Minkultam.
![](http://nashaniva.com/img/w732d4webp1/photos/z_2019_09/h_15_03-q3exp.jpg.webp)
Novyja budynki buduć nie vyšejšyja za try pavierchi, apošni, čaściej za ŭsio, mansardny. Što tyčycca napaŭnieńnia, to, pa słovach architektaraŭ, na pieršych uzroŭniach raźmieściacca ŭstanovy hramadskaha charčavańnia, vyšej — abjekty servisu.
Pakolki ŭ Rakaŭskim pradmieści ŭ raniejšyja časy znachodzilisia haradski vał i bastyjon, prajektam rehienieracyi zabudovy prapanujecca paznačyć hetaje miesca admysłovymi pryjomami — z dapamohaj łandšaftnaha dyzajnu i dobraŭparadkavańnia.
Kamientary