Pistalet Makarava za $250, «kałašnikavy», artyleryjski snarad. U Baranavičach sudziać za kradziež i handal zbrojaj

Na łavie padsudnych 10 čałaviek. Siarod abvinavačanych vajskoŭcy, milicyjant, cyvilnyja śpiecyjalisty i biespracoŭnyja. Śledstva ciahnułasia amal hod, piša Radyjo Svaboda.

Abvinavačańnie začytvali bolš za dźvie hadziny

Praces 10 vieraśnia ŭ Baranavickim sudzie pačaŭsia ź nievialikim spaźnieńniem. U admysłovaj kletcy chapiła miesca nia ŭsim abvinavačanym. Dvaich ź ich pasadzili pobač z kanvairami, adnaho pry hetym prykavali da milicyjanta kajdankami. Akramia abvinavačanych, u zalu zajšli dziesiać advakataŭ, try prakurory i bolš za dvaccać hledačoŭ, siarod ich rodnyja abvinavačanych. Paśla aznajamleńnia sa składam prysutnych u zali sudździa Litviinčyk paprasiła prakuroraŭ začytać abvinavačańnie. Heta zaniało bolš za dźvie hadziny

Pra kradziažy zbroi i bojeprypasaŭ u adnoj z vajskovych častak Baranavičaŭ stała viadoma 6 žniŭnia 2018 hodu. Paźniej fakt kradziažu paćvierdzili ŭ Minabarony i Śledčym kamitecie. 8 žniŭnia SK paviedamiŭ pra zatrymańnie 14 čałaviek. Inicyjataram kryminalnaj spravy staŭ kamandzir častki.

Jak stała viadoma Svabodzie ŭ kancy vosieni 2018 hodu, u spravie ab kradziažy zbroi z vajskovaj častki Baranavičaŭ było zatrymana kala 20 čałaviek. Niekatorych zatrymlivali na terytoryi Rasiei. Viasnoj i letam 2019 hodu prajšło niekalki sudovych pracesaŭ, źviazanych z kradziažom vajskovaj ahniastrelnaj zbroi. Pra ich ŚMI daviedalisia ŭžo paśla vyniasieńnia prysudaŭ. Razhlad, jaki pačynajecca ŭ sudzie Baranavičaŭ 10 vieraśnia, stanie asnoŭnym u hetaj spravie.

Pistalety za 250 dalaraŭ

Zhodna z dadzienymi papiaredniaha śledztva, ahučanymi prakurorami padčas pieršaha dnia pasiedžańnia, usie epizody z kradziažami zbroi z vajskovaj častki datyčać 2017 i 2018 hadoŭ. Adnymi z asnoŭnych fihurantaŭ pracesu źjaŭlajucca Jury Marčanka, jaki zahadvaŭ adździełam materyjalnaha zabieśpiačeńnia vajskovaj častki, i były milicyjant Baranavickaha RUUS major Alaksandar Vieka.

Prykładna pałova z ahučanych prakurorami złačynnych epizodaŭ datyčyć dziejańniaŭ hetych dźviuch asobaŭ. Pavodle materyjałaŭ śledztva, Alaksandar Vieka nieadnarazova nabyvaŭ u Juryja Marčanki pistalety Makarava i patrony da ich. Taksama śledztvu viadomyja fakty nabyćcia byłym milicyjantam vintoŭki i złačynnaj zmovy z Marčankam, metaj jakoj byŭ prodaž aŭtamata Kałašnikava i 120 bajavych patronaŭ da jaho.

Z materyjałaŭ śledztva viadoma, što major Alaksandar Vieka płaciŭ Juryju Marčanka ad 250 da 600 dalaraŭ za kožny ź pistaletaŭ Makarava, jakija atrymlivaŭ u vajskoŭca. Zbroju i bojeprypasy były milicyjant zachoŭvaŭ doma i na leciščy, pieravoziŭ pa Baranavičach i terytoryi Lachavickaha rajonu na aŭtamabili. Pierad pačatkam pasiedžańnia Alaksandar Vieka zajaviŭ sudździ, što nie daviaraje składu sudu.

«Ja ŭvohule nikomu nie daviaraju, — skazaŭ Vieka. — Vam u tym liku».

«Znachodziačysia ŭ stanie alkaholnaha apjanieńnia, zrabiŭ nia mienš za 20 strełaŭ»

Akramia byłoha milicyjanta Alaksandra Vieka i vajskoŭca Juryja Marčanki, na łavie padsudnych były zahadčyk składa vajskovaj častki Dźmitry Kulžyk, niekalki biespracoŭnych, byłyja supracoŭniki biełaruskaha filijału rasiejskaj transpartnaj kampanii, byłyja vajskoŭcy. Pavodle materyjałaŭ spravy, ahučanych prakurorami, usie jany ŭ roznaj stupieni datyčnyja da niezakonnaha nabyćcia, zachoŭvańnia i pieramiaščeńnia zbroi i vybuchovych rečyvaŭ.

U pryvatnaści, vajskovy technik Maksim Norykaŭ abvinavačvajecca ŭ tym, što zachoŭvaŭ u siabie doma, a taksama na ŭłasnym leciščy vybuchovyja rečyvy, u tym liku bajavyja hranaty i biazdymny porach. A jašče askiepkava-fuhasny artyleryjski snarad.

Jak miarkuje śledztva, usio heta (i jašče kala sotni patronaŭ da pistaleta Makarava) Norykaŭ moh nabyć u zhadanaha vyšej Juryja Marčanki. Pry hetym zachoŭvańniem zbroi Norykaŭ nie abmiažoŭvaŭsia.

«Byŭšy ŭ stanie alkaholnaha apjanieńnia, u adzin ź dzion traŭnia 2018 hodu niezakonna pieramiaściŭ ahniastrelnuju zbroju ŭ lasny masiŭ, — havorycca ŭ materyjałach śledztva. — Dzie ździejśniŭ kala 20 strełaŭ».

Akramia Norykava, stralaninaj ź pistaletaŭ Makarava ŭ vakolicach Baranavičaŭ zajmalisia i inšyja abvinavačanyja. U pryvatnaści, biespracoŭny Mikałaj Čorny.

Pavodle spravy, złačynnaja dziejnaść, źviazanaja ź niezakonnym abaračeńniem ahniastrelnaj zbroi i vybuchovych rečyvaŭ, praciahvałasia jak minimum z 2017 hodu i była spynienaja pravaachoŭnymi orhanami ŭ lipieni 2018-ha. Bolšaść epizodaŭ datyčyć niezakonnaha handlu, zachoŭvańnia i pieramiaščeńnia pistaletaŭ Makarava, a taksama patronaŭ da ich. Akramia hetaha, u materyjałach spravy fihurujuć niekalki aŭtamataŭ Kałašnikava i vybuchovyja rečyvy, u tym liku bajavyja hranaty roznych system.

Usie abvinavačanyja byli ŭ roznaj stupieni znajomyja pamiž saboj. Taksama viadoma jak minimum niekalki vypadkaŭ niaŭdałych sprobaŭ prodažu zbroi, mierkavanyja pakupniki prachodziać u spravie ŭ jakaści śviedak, ich planujecca dapytvać u inšyja dni.

Važnyja fakty pra spravu ab handli zbrojaj u Baranavičach

Adzin ź fihurantaŭ spravy — 24-hadovy praparščyk Dźmitry Kulžyk, jaki, pavodle papiaredniaj infarmacyi, vynosiŭ zbroju z terytoryi častki. Rodnyja Dźmitryja jahonuju vinu kateharyčna admaŭlajuć. Maci Dźmitryja Łarysa pra zatrymańnie syna daviedałasia tolki praź piać dzion, kali da jaje ź pieratrusam pryjechała śledčaja hrupa.

Siarod tych, kaho pačynajuć sudzić u aŭtorak 10 vieraśnia, akramia načalnika składa Kulžyka, taksama kiraŭnik stałoŭki, operupaŭnavažany adździeła kryminalnaha vyšuku, kiroŭca-ekspedytar, avijacyjny technik, ślesar ramontu aŭtamabilaŭ, technik i try biespracoŭnyja.

Jany abvinavačvajucca pavodle roznych častak artykułaŭ 211 (prysvajeńnie albo rastrata majomaści), 294 (kradziež ahniastrelnaj zbroi, bojeprypasaŭ i vybuchovych rečyvaŭ), 295 (niezakonnyja dziejańni z ahniastrelnaj zbrojaj, bojeprypasami i vybuchovymi rečyvami), 296 (niezakonnyja dziejańni ŭ dačynieńni chałodnaj zbroi), 339 (chulihanstva) Kryminalnaha kodeksu.

• 0
• 0
• 0
• 0
• 0
• 0