Pieršy ŭ Biełarusi teatralny piknik adbudziecca 21 vieraśnia. Jaho praviadzie Kupałaŭski teatr, kab adznačyć pačatak 100-ha siezona ŭ vialikaj kampanii haściej. Prahrama pačniecca a 12:00 i praciahniecca da poźniaha viečara. Hości zmohuć pačastavacca ŭ street-bufiecie, zrabić sabie vusy, jak u maładoha Kupały, prahulacca pa teatralnym zakuliśsi, atrymać zaprašeńni na zakrytyja pakazy śpiektaklaŭ i navat šaniec vyjści na scenu Kupałaŭskaha. Na piknik zaprašajucca ŭsie achvotnyja. Uvachod volny, pažadana zachapić pled.
Raspačynajučy 100-y tvorčy siezon, Kupałaŭski teatr vychodzić za miežy teatralnaj zały. Vialikaje śviata voźmie pačatak na hałoŭnaj scenie i razhorniecca ŭ prastory ŭsiaho Alaksandraŭskaha skviera. Na ceły vychadny dzień centr Minska pahruzicca ŭ teatralnuju atmaśfieru. Pa skviery buduć hulać piersanažy śpiektaklaŭ u aryhinalnych kaściumach, možna budzie fatahrafavacca ź imi, a taksama z sapraŭdnymi teatralnymi dekaracyjami i rekvizitam śpiektaklaŭ.
Na piknik arhanizatary zaprašajuć prychodzić ź pledami, kab było ciopła i atmaśfierna. Pryjemny bonus: uładalnik samaha vialikaha pleda atrymaje zaprašeńnie na zakrytyja pakazy ŭsich premjer ciaham siezona. Dla tych, chto nahulaje apietyt, na pikniku budzie pracavać street-bufiet, dzie staličnyja kaviarni i restarany pradstaviać teatralnyja sety. Desiert z žuravinavym morsam «Ludzi na bałocie», sendvič z čornaj harbataj «Čornaja panna Niaśviža», zialony čaj z kanape «ČajKa», štrudziel ź biezałkaholnym hlintviejnam «Noč na Kalady» — daloka nie poŭny pieralik prysmakaŭ vuličnaha bufieta.
Na scenie skviera vystupić unikalny Kupałaŭski arkiestr i sučasnyja muzyki. Jak kažuć, talenavityja ludzi talenavityja va ŭsim — šmat chto z kupałaŭcaŭ zajmajecca muzyčnaj dziejnaściu. Naprykład, adzin z hurtoŭ, jaki vystupić na pikniku, ili-ili — heta prajekt akcioraŭ Dźmitryja Jesianieviča, Michaiła Zuja i muzykanta teatralnaha arkiestra Eryka Arłova-Šymkusa. Akramia ich, u muzyčnaj prahramie voźmuć udzieł Jahor Zabiełaŭ, Śviatłana Bień, hurt «Kasijapieja» dy inšyja.
21 vieraśnia ŭpieršyniu pastanoŭku Kupałaŭskaha možna budzie pahladzieć na vulicy: u skviery adbudziecca žyvaja tranślacyja śpiektakla «Radziva Prudok», pastaŭlenaha pa našumiełaj knizie Andrusia Horvata. Padčas piknika hości zmohuć trapić za kulisy teatra i navat adčuć siabie sapraŭdnymi akciorami, ale ŭmovy hetych mahčymaściaŭ, jak i padrabiaznuju prahramu mierapryjemstva, arhanizatary raskryjuć bližej da śviata.
