Pa asabistym daručeńni kiraŭnika dziaržavy nastaŭnica homielskaj škoły №15, jakaja pahražała vučniu, była ŭznoŭlenaja na pracy. «NN» paprasiła prakamientavać hety incydent pres-sakratarku kiraŭnika dziaržavy Natallu Ejsmant.
«Tak, adnaŭleńnie piedahoha ŭ 15-j škole Homiela — heta pramoje daručeńnie kiraŭnika dziaržavy. Kali Alaksandr Łukašenka daviedaŭsia pra incydent, to jon zapatrabavaŭ nieadkładny dakład ab situacyi, a kali pahłybiŭsia ŭ padrabiaznaści — adreahavaŭ vielmi emacyjna i žorstka. I jak kiraŭnik dziaržavy, i jak piedahoh pa śpiecyjalnaści, jaki pracavaŭ u škole.
Ja ŭžo kamientavała vašym kaleham siońnia hety incydent i nahadvała, jak 2 vieraśnia na liniejcy prezident, moža, i nie pa-śviatočnamu, ale całkam adkryta i kankretna kazaŭ pra dyscyplinu, pra rolu i baćkoŭ, i nastaŭnikaŭ u vychavaŭčym pracesie. A jašče pra toje, što škoła — heta chram, kudy treba prychodzić vučycca, a nie čynić biasčynstvy, jak adbyłosia ŭ dadzienym vypadku. Heta byŭ jarki prykład usiodazvolenaści z boku vučniaŭ, chamskaha staŭleńnia da nastaŭnika i škoły.
Całkam vidavočna, što takija rečy ŭ škole prosta niedapuščalnyja! Aburyŭ prezidenta i čerstvy, abyjakavy padychod miascovych kiraŭnikoŭ da losu čałavieka, kali razabralisia zusim paviarchoŭna, a moža, i ŭvohule nie razabralisia — zvalniajuć śpiecyjalista z 35-hadovym stažam! Jaki da hetaha ni razu nie daŭ padstavy ŭsumnicca ŭ svajoj prystojnaści. Prezident na takija situacyi reahuje imhnienna — tym bolš što litaralna dva tydni tamu ŭsie adkaznyja za adukacyju ŭ našaj krainie ludzi čuli jaho daručeńni prosta na liniejcy!
Fota Tut.by.
Mienavita tamu, jak užo paviedamlałasia, pryniaty taksama žorstkija rašeńni ab pakarańni słužbovych asob. Za niepryniaćcie mier pa naviadzieńni paradku ŭ škołach i nievykanańnie daručeńniaŭ prezidenta stroha papiaredžany premjer-ministr [Siarhiej Rumas — «NN»], kiraŭnik Administracyi prezidenta [Natalla Kačanava — «NN»] i vice-premjer, jaki kuryruje hetuju śfieru [Ihar Pietryšenka — NN»]. Ministr adukacyi [Ihar Karpienka — «NN»] papiaredžany ab niapoŭnaj słužbovaj adpaviednaści, vymovy abvieščanyja šerahu słužbovych asobaŭ Homielskich abł- i harvykankamaŭ. Taksama ŭ adnosinach da niekatorych słužbovych asob Homielskaha harvykankama, rajonnaj administracyi i dyrektara nazvanaj škoły pryniata rašeńnie ab vyzvaleńni ad zajmanych pasadaŭ ź pieravodam na inšuju pracu», — skazała spadarynia Natalla.
«Ja ŭ turmu pajdu, a tabie p***iec budzie»: homielskaja nastaŭnica kinułasia na 4-kłaśnika, bo toj zaśmiajaŭsia VIDEA
Nastaŭnicu, jakaja pahražała stuknuć školnika partaj i abražała jaho, zvolnili
Skandalnuju nastaŭnicu z Homiela adnavili pa pramym ukazańni Łukašenki
