Na miažy Buracii i Irkuckaj vobłaści zatrymany jakucki šaman Alaksandr Habyšaŭ, jaki pieššu išoŭ u Maskvu dziela «abradu vyhnańnia Pucina».
Nienazvany spadarožnik šamana raspavioŭ Znak.com, što Habyšava zatrymali, kali jon spyniŭsia dla načoŭki ŭ rajonie fiederalnaj trasy, pa jakoj idzie ŭ Maskvu.
«Pryjechali dva aŭtobusy z palicyjaj, skrucili i zahruzili razam z kalaskaj i pavieźli ŭ bok Ułan-Ude», — skazaŭ surazmoŭca Znak.com. Pavodle jaho słoŭ, suprać Habyšava mohuć raspačać kryminalnuju spravu ab arhanizacyi ekstremisckaj supolnaści.
Jak piša «Tajha.Info» sa spasyłkaj na vidavočcaŭ, ludzi, jakija zatrymali Habyšava, nie pradstavilisia, jany byli ŭzbrojeny aŭtamatami i dubinkami. Šamana mahli zatrymać supracoŭniki siłavych struktur z Čycinskaj vobłaści za arhanizacyju niesankcyjanavanaha mitynhu ŭ Čycie ŭ lipieni 2019 hoda.
Alaksandr Habyšaŭ — žychar Jakucka, jaki nazyvaŭ siabie «šamanam-vajarom». U sakaviku 2019 hoda jon pačaŭ piešy pachod u Maskvu, kab pravieści «abrad vyhnańnia Pucina». Pa darozie da Habyšava dałučajucca prychilniki. Jon płanuje dajści da stalicy ŭ 2021 hodzie.
